D’ente les abondes posibilidaes qu’ufre’l Plan de Recuperación Estatal pa potenciar la economía del país y finar con desigualdaes, el “Principado” decide invertir en prevenir teóricos ciberataques
El Plan de Recuperación, Tresformación y Resiliencia, puestu en marcha pol Estáu p’afrontar les consecuencies de Covid-19 tien como finxu facer medrar “de forma efeutiva, coherente y duradero el xorrecimientu potencial de la economía”. Más entá, l’ambiciosu plan pretende enfrentar les consecuencies non solo del virus, sinón tamién del cambiu climáticu y l’avieyamientu poblacional, algamar la igualdá efeutiva pente homes y y muyeres y la vertebración territorial superando la fienda urbano-rural, completando la “transición enerxética”y afalando la necesaria tresformación dixital de les empreses y Alministración.
Nel plenu de la Xunta Xeneral d’ayeri martes, el vicepresidente del Gobiernu asturianu y Conseyeru d’Alministración Autonómica, Mediu Ambiente y Cambiu Climáticu, Juan Cofiño, vien d’anunciar que’l Principáu va aprofitar estos recursos del Plan de Recuperación y Resiliencia pa reforciar la ciberseguridá na Alministración autonómica, intensificando’l llabor en materia de ciberseguridá, depués de reparar que la ciberdelincuencia «convirtióse nuna pandemia nueva capaz de destruyir sistemes informáticos vitales».
Llucía F. Marqués
This work is licensed under a Creative Commons Attribution 4.0 International License.
