El descensu más acusáu dase en grandes ciudaes, especialmente n’Uviéu, con 191 escolinos menos de primeru d’infantil

Una vegada rematáu’l plazu de matrícula pal prósimu cursu escolar costátase que les aules asturianes van abrir  en setiembre con 568 rapacinos de trés años menos que l’añu pasáu.

Esti enclín vien repitiéndose los últimos años; tantu ye asina que solo l’añu pasáu la matrícula escolar ente primaria y secundaria cayó en 1648 escolinos. Nesi sen, nun hai desemeyances ente centros públicos y privaos alcordaos.

Solo nos postreros cinco años, hubo un amenorgamientu de 1.147 escolinos de tres años. La Conseyería da a esto la rempuesta evidente “débese al descensu de la natalidá”.  Llueñe d’aprovechar esti descensu pa menguar ratios y ameyorar la calidá educativa, la opción tomada pol Gobiernu Asturianu ye la de retayar gastos: nes dos últimes décades preslláronse más de 600 aules n’Asturies.

La novedá ta en qu’anguañu los más perxudicaos son los conceyos más poblaos -con esceición de Siero-. N’Uviéu, Xixón y Avilés baxa bultablemente la matricula pal primer cursu escolar. El descensu más acusáu atópase na capital, onde s’iscribieron pa empecipiar la etapa infantil 191 menores menos.