Iniciativa pol Asturianu reclama la recuperación de la presencia del asturianu na web del Conceyu de Xixón, como ta recoyío nel Plan de Normalización Llingüística vixente
En xunu l’añu pasáu estrenóse la nueva páxina web del Conceyu de Xixón. Seique anicialmente entamó a furrular na so versión n’español, la Oficina de Normalización lleva dellos meses tornando los sos conteníos y apurriéndolos a los responsables de la páxina, ensin qu’estos suban a la mesma la so versión asturiana.
Poro, Iniciativa pol Asturianu reclama que se torne a espublizar la páxina municipal cola so versión n’asturianu. Asina lo va treslladar güei mesmo nel Conseyu Asesor de la Llingua.
Según declaraciones del presidente y representante del colectivu nel muérganu, Iván Llera “vamos reclamar nel Conseyu Asesor de Xixón una solución pa que la llingua asturiana torne a tener presencia na web del Conceyu de Xixón”. “Nun tien xustificación qu’un añu depués de la presentación del nuevu portal l’asturianu siga ensin tener presencia dala”, llamentó, al tiempu qu’esplicó que “la Oficina de Normalización lleva meses tornando conteníos que depués nun se suben a la web, quedando munchos d’ellos desactualizaos”.
La presencia del asturianu na páxina web municipal ye un mandatu recoyíu nel Plan de Normalización Llingüística pal periodu 2020-2023. El puntu 16 del documentu, aprobáu por mayoría nel Plenu municipal d’agostu, apunta a “emplegar l’asturianu nos conteníos istitucionales de la nueva páxina web municipal xunto col castellanu, teniendo d’equiparar pasu ente pasu los demás conteníos, asina como los de les empreses municipales”. Tampoco se ta faciendo usu del dominiu xixon.es, qu’un añu depués, sigue redireccionando a la versión vieya de la web.
Iniciativa pol Asturianu reclama un esfuerciu por parte de la municipalidápa dar cumplimiento a lo recoyío nel Plan de Normalización ya incorporar de manera urxente l’asturianu a la web del Conceyu.
Redaición Infoasturies
This work is licensed under a Creative Commons Attribution 4.0 International License.
