Vienen d’aniciar una campaña de recoyía de robles solicitando la modificación darréu de la Llei d’Honores d’Asturies, que permita se yos conceda’l títulu de Fios Predilectos d’Asturies a los guerrilleros antifranquistes 

Nel añu 2010 la Federación Asturiana Memoria y República (FAMYR) realizó una campaña p’algamar  el reconocimientu de dos guerrilleros antifascistes asturianos, Cristino García Granda y Jose Antonio Alonso “Comandante Robert”. Nesa campaña solicitábase al Parlamentu Asturianu la concesión de títulu de “Fios predilectos d’Asturies” que se otorga añalmente a persones nacies n’Asturies que, al menos en teoría, destacaren polos sos méritos relevantes. Desafortunadamente, pesi a ser respaldá poles robles de más de 2.000 ciudadanos y por 72 organizaciones, la pidición foi desestimá. En so llugar el gobiernu asturianu decidió otorga-yla al entos xefe de la Casa real, Alberto Aza Arias. N’años anteriores fueren galardonaos l’ex-secretariu de la Casa Real Sabino Fernández Campo (1991) o’l Príncipe d’Asturies (1986).

En 2013 dende la Federación Asturiana Memoria y República (FAMYR), l’Asociación pa la creación del archivu de la guerra civil, les brigaes internacionales, los neños de la guerra, la resistencia, la guerrilla y l’esiliu español (AGE) y Asociación de Descendientes del Esiliu Español retomaron una nueva campaña espardiéndola a todos aquellos guerrilleros y resistentes antifascistes asturianos qu’entá quedaben vivos, pero, como faen notar dende FAMYR,  “enterraos nel escaezu ya inoraos pola memoria coleutiva del pueblu asturiano, robándomos l’exemplu de la so vida como lluchaores pola llibertá“. Desafortunadamente tamién nesta ocasión el Gobiernu asturianu, presidíu por Javier Fernández desestimó dicha pidición.

El domingu 15 de Xunu de 2014 cellebróse un homenaxe nel pueblu de Vira, Ariege, al veteranu comandante de los guerrilleros, José Antonio Alonso, mejor conocido como’l comandante “Robert”. El presidente del senáu francés Monsieur Jean Pierre Bell fizo-y entrega de la Orde  del Méritu Nacional pol so heroicu papel na lliberación de la ciudá de Foix, capital del departamentu del Ariege. El comandante Robert morrió en 2015 ensin qu’Asturies lu reconociere.

El reciente fallecimiento de Vicente Garcia Riestra (09/05/2019), el caberu asturianu superviviente del campu de concentración de Buchenwald, dio llugar a centenares de reconocimientos por toa Europa a la so llabor na llucha a favor de les llibertaes, mientres que n’Asturies nun-y fue reconocíu dengún méritu.

Nel 2019, tres el cambiu nel Gobiernu asturianu y la entrada a la Presidencia d’Adrian Barbón (PSOE), volvieron a intentalo. Nesta ocasión el gobiernu amparóse nuna aplicación restrictiva de la Llei 4/1986, de 15 de mayu, regulaora de los honores y distinciones d’Asturies, allegando el Gobiernu asturiano “que solo se pueden conceder dichos honores si tuvieren vivos”, daqué qu’ellos mesmos imposibilitaron, retrasando esta concesión.

Poro, piden una modificación darréu de dicha Llei, que permita se yos conceda el títulu de Fios Predilectos d’Asturies a los guerrilleros antifranquistes, pa lo qu’aniciaron una recoyía de robles en change.org.