El primer actu d’autodeterminación d’Asturies na época contemporánea, la declaración de Soberanía de la Xunta Xeneral, foi disuelta pola fuercia pol exércitu español, cola oposición espresa por escrito de, ente otros, Jovellanos

213 años depués de la Declaración de Soberanía del 25 de mayu ye mester remembrar ún de los acontecimientos más interesantes y motivadores de la Hestoria d’Asturies, non sólo polos fechos en sí, sinón polo que representaron y polo muncho que mos cuenten del sentimientu identitariu y defensor de la llibertá de los asturianos a lo llargo la hestoria.

El 9 de mayu de 1808 aportaron a Uviéu dende’l gobiernu d’España les órdenes pa sometese a la ocupación francesa y la noticia del fusilamientu de dellos asturianos nel 2 de mayu, lo que prevocó la indignación de los asturianos que, poco dimpuestos a acatar les ordenes,  presionaron a los diputaos de la Xunta Xeneral a rebelase ya inorar les órdenes.

Sicasí, la mayoría los diputaos retractáronse a los pocos díes de la decisión tomada, acatándo les istruciones, daqué que’l pueblu nun diba consentir. El 25 de mayu de 1808 miles de campesinos ya estudiantes (pente los que queda memoria de dos muyeres, Xuaca Bobela y Marica Andayón) asaltaron la fábrica d’Armes d’Uviéu, entrando armaos na capital. Tomaron l’Audiencia y col sofitu d’una parte de los diputaos costituyeron un nueu órganu de gobiernu, la Xunta Suprema, autoproclamada soberana.

Tres de xurar la soberanía popular, ello ye, que «el poder, tou el poder, reside y procede del pueblu» asumieron tolos atributos d’un estáu soberanu, talos como la bandera, exércitu propiu (l’Exércitu Defensivu Asturianu, con 30.000 homes de tolos conceyos) ministerios y embaxadores. Darréu, declararon la guerra a Napoleón Bonaparte unviando a Llondres una embaxada pa pedir sofitu militar.

Foi M.G de Xovellanos quien recibió l’encargu de diseñar una bandera propia, que, con dalgunes variaciones respeutu al diseñu orixinal, siguimos usando. Aquella tinía un añadíu prestosu: llevaba grababa, en lletres doraes, la frase ‘Asturies nunca vencida’. Como datu interesante diremos qu’España nun tinía entá d’aquella más bandera que la d’usu militar.

cuando al otru añu una intervención militar del exércitu español punxo fin a la Xunta Soberana, la llinia argumental dexada per escrito por Xovellanos na so defensa foi el fechu de que la Xunta asturiana ye preesistente a la española, porque tien sieglos d’antigüedá, y polo tantu aquella nun tien autoridá pa disolvela, pero argumentos pocu valieron escontra fuercia y nun consiguió con ello caltener la nuesa soberanía.

Llucía F. Marqués

This work is licensed under a Creative Commons Attribution 4.0 International License.