De Bolado destacó’l so valir personal y lliterariu, pero perriba d’ello, el so fondu y continuu compromisu cola llibertá, la llingua y la cultura d’Asturies

L’escritor, Académicu de la Llingua, estudiosu de la lliteratura asturiana y espresidente del Atenéu Obreru de Xixón, Xose Bolado, finó ayeri xueves 20 de mayu tres d’una llarga enfermedá

Ñacíu n’Uviéu nel añu 1946 y vecín de Xixón, Bolado llicenciose’n Filosofía y lletres y foi profesor n’istitutos d’Asturies y Madrid, onde se treslladó nos caberos años del so trabayu docente.

Los que lu conocieron personalmente destaquen d’elli el so valir personal, la so amabilidá, entusiasmu y simpatía. Nel ámbetu políticu y lliterariu, Bolado destacó dende mozu pola so militancia nel Movimientu Comunista d’Asturies, siendo fundador y presidente del Atenéu Obreru de Xixón y dando puxu col so trabayu a la espublización de la coleición poética Deva y de la “Antoloxía Poética del Resurdimientu”. En 1988 foi escoyíu miembru de númberu de la Academia de la Llingua Asturiana, onde promovió la creación de la revista ‘Lliteratura’, de la que foi direutor dica va cuatro años.

De la so obra lliteraria destaca ‘Conxura contra la decadencia’ (Llibros del Pexe, 2002), ‘Na estación de los relevos‘ (Llibros del Pexe, 2006) y ‘La bona intención/La buena intención‘ (Impronta, 2012).

Nel comunicáu fechu pola ALLA con motivu del so fallecimientu declaren que «Cola muerte de Xosé Bolado, l’Academia de la Llingua Asturiana y tolos que formamos parte d’ella perdemos a un compañeru col que siempre se podía cuntar, a un home comprometíu, cabal, atentu y cariñosu y, sobremanera, a un amigu lleal qu’enxamás escaeceremos. Sibi tibi terra levis».

Dende InfoAsturies sumámonos a la dispidía qu’Asturies entera-y da. Que la tierra te seya sonce.

Redaición InfoAsturies

This work is licensed under a Creative Commons Attribution 4.0 International License.