Nel estudiu participen los escolinos de los tres colexos piloñeses ya’l so cuestionariu ta abiertu a la participación voluntaria
L’Asociación LaKadarma, na que s’enmarca la banda de gaites asitiada en L’Infiestu, entamó dende va unes selmanes el proyectu “El Rebuscu de Piloña”, col que quieren facer una bas de datos lo más amplia posible sobro los músicos nel conceyu Piloña y la so contorna. Pa ello pidin la collaboración ciudadana, apurriendo cualisquier información posible al respeutu y retrucando al so cuestionariu nel que busquen pistes de posibles músicos. Un instrumentu vieyu rodando per casa pue ser ñiciu d’un antepasáu músicu, una semeya, una alcordanza… El cuestionariu tamién ta disponible na web www.lakadarma.com pa toes aquelles persones que quieran participar.
Na actividá participen los tres colexos piloñeses, “L’ablanu” (L’Infiestu), “El Plaganón” (Sebares), “Julio Rodríguez Villanueva” (Villamayor) y l’IES d’Infiestu. Tolos escolinos fadrán la encuesta nel so llar, entrugando a les sos families por músicos antiguos del conceyu, asina como semeyes, grabaciones y testimonios que puedan ayudar a conocer y caltener la memoria cultural del conceyu.
Esi nun ye un proyeutu aislláu, sinon que con elli LaKadarma pretende abrir una estaya de collaboración colos centros educativos de Piloña pa promover actividaes venceyaes a la cultura tradicional asturiana.
Redaición InfoAsturies
This work is licensed under a Creative Commons Attribution 4.0 International License.
