Denunciaron énte los Conceyos de Villaviciosa, Sariegu y Siero l’usu de yerbicíes na Autovía del Cantábricu A-64, tantu nos arcenes como na mediana de la carretera, col consiguiente impautu ambiental en tiempu de lluvies

L’usu de yerbicíes nes carreteres ta prohibíu na rede autonómica del Principáu dende l’añu 2008 y práuticamente erradicáu n’Europa, polos riesgos que trai la tosicidá d’estos productos pa tolos seres vivos. Estudios de tosicidá revelaron ente los sos efectos adversos: tosicidá subaguda y crónica, daños xenéticos, trestornos reproductivos, aumentu de la frecuencia d’anomalíes espermátiques y carcinoxénesis.

Los pesticidas aplicaos en carreteres, esllíense nel agua de lluvia y al traviés de les cunetes desagüen direutamente a los ríos, col consiguiente perxuiciu pa la fauna piscícola. Coles mesmes, pueden contaminase los acuíferos, col pelligru que trai pa la salú humana. Ye más grave nel tramu de Villaviciosa, porque acaba na Reserva natural de la ría cola consiguiente contaminación. Afeuta amás a la fauna montesa y el ganáu que pastia per eses zones.

La supuesta xustificación pa estos sulfatamientos ye esaniciar yerba pa favorecer la visibilidá de les carreteres y amenorgar los riesgos de quema, “argumentos tan inútiles como falsos, ya que fumigose de forma indiscriminao tol tramu, con delles pasaes, y l’ensugar la yerba nun amenorga’l peligru de quemes, cenciellamente adelantralu, esponiendo amás a futuros argayos pola falta de protección vexetal énte les lluvies” declaren dende la CEA.

Los conceyos de Villaviciosa, Siero y Sariegu son les entidaes responsables d’autorizar estes pelligroses práutiques. La Coordinadora Ecoloxista solicitó-yos que prohiban los sulfatamientos de les cunetes con yerbicíes, y que namás s’esanicie de forma mecánica aquella yerba que pueda afectar a la seguridá vial o como midía de prevención de quemes. Amás, desixen conocer que productos s’usaron y que se-yos informe sobro si s’avisó en tiempu y forma a tolos centenares de propietarios de les parceles colindantes de l’autopista.

Finalmente, consideren necesario que s’informe a la población del pelligru que supón el consumu de productos agroalimentarios de la zona afeutaos por estos yerbicíes.

Nuria Prendes

This work is licensed under a Creative Commons Attribution 4.0 International License.