• Portada
  • >
  • Asturies
  • >
  • Presentación de la XXVIII edición del Campionatu Oficial d’Echaores d’Asturies

Presentación de la XXVIII edición del Campionatu Oficial d’Echaores d’Asturies

  • 5 Mayu, 2021

L’anterior edición tuvo de ser suspendía ensin declarar campión oficial, al anulase los concursos polos preslles perimetrales y la imposibilidá d’acudir a los mesmos

La see del Conseyu Regulador de la DOP Sidre d’Asturies (Villaviciosa) acoyó l’actu de presentación de la XXVIII edición del Campionatu Oficial d’Echaores d’Asturies, nel que tuvieron presentes el presidente del Conseyu Regulador DOP Sidre d’Asturies, Celestino Cortina; Félix de la Fuente, presidente de l’Asociación d’Echaores; Javier Fernández, responsable de Sidreríes de Otea; Saúl Moro, cordinador del campionatu y l’ alcalde de Villaviciosa, Alejandro Vega. A Javier Nievas, responsable del Departamentu de Mediu Rural de Caxa Rural d’Asturies, nun-y fue posible acudir a la presentación.

Nel actu confirmaron qu’hai, a día de güei, diez concursos apautaos, más de los ocho que son necesarios sigún los estatutos del Campionatu pa dalu por válidu. La cita qu’inagura esta edición  sedrá’l próximu sábadu 8 de mayu, en Cabranes. Dempués, siguiránlu los concursos de Nava, Bimenes, La Felguera, Carreño, Llanes, Xixón, Villaviciosa, Siero y Uviéu, seique les feches nun tan afitaes, n’espera a conocese les condiciones del final del estáu d’alarma. En tolos concursos siguirán cumpliéndose les normes de seguridá pertinentes y un añu más, el campionatu va ser retresmitíu vía streaming.

Nes sos intervenciones toos coincidieron nel esfuerciu col que’l sector sidreru ta enfrentándose a estos tiempos abegosos y nel enfotu de dar puxu a la sidre asturiana y a la figura del echaor. Celestino Cortina destacó la emportancia de dar puxu a la tradición d’echar la sidre, frente a la xorreciente invasión de los aparatos llétricos. Pela so parte, Javier Fernández allantró que ta trabayándose nel certificáu de profesionalidá del seutor.“La sidre y los sidreros, por cultura y tradición, merecen siguir esfrutando d’esti campionatu”, declaró’l so coordinador, Saúl Moro, entantu que Félix de la Fonte centróse n’agradecer la so collaboración a los patrocinadores, DOP, Caxa Rural y OTEA.

El Campionatu tuvo de ser suspendíu nel 2020, depués d’aniciar los sos concursos estrenando direutiva, pola imposibilidá de desplazase pente conceyos. Poro, seique Wilkin Aquiles diba per delantre na clasificación depués de los 6 primeros concursos, el campión oficial continúa siendo Salvador Ondó, ganador del Campionatu nel añu 2019.

Llucía F. Marqués


This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies