Esta primavera l’actual tienda online Musicasturiana.com tórnase nun mediu de comunicación, una guía de recursos y va dar abellugu al AMCA
El 25 de payares de 2017 nacía musicasturiana.com, la primer tienda online y distribuidora dixital dedicada namás a la música d’espresión asturiana. Tres años depués, esta web vendió más de 1.800 CDs, algamó más de 10 millones de reproducciones nes plataformes dixitales, fizo que se sintiera música asturiana en más de 100 países y desendolcó actividaes como’l ciclu de presentaciones de discos Amosando. L’aniciativa va dar esta primavera un pasu más nel so llabor, llanzando una nueva web cola qu’amplía’l proyectu.
El pasáu vienres foi’l primer pasu cola apertura d’una tienda online remocicada que tien más de 320 artículos a la venta. Nes próximes selmanes, musicasturiana.com va entamar aser tamién un mediu de comunicación dedicáu a la música’l país, una guía de recursos de la escena musical d’equí y va da-y agospiu al AMCA (Archivu de la Música Contemporánea Asturiana), una iniciativa de Goxe Producciones que, ente otres coses, va dixitalizar y poner a disposición del públicu un conxuntu de materiales bayurosu y perinteresante (con bien de conteníos inéditos y/o esclusivos).
Pa poder desendolcar too esto, dende la páxina web punxeron en marcha la campaña de micromecenazgu “Esto nun ye un Crowfunding, equí pasamos el cepillu”. Son tres tipos de cuotes anuales (15 €, 30 € y 60 €) pa que quien quiera sofitar el proyectu, pueda asociase y tener asina accesu a conteníos esclusivos, artículos de regalu y participaciones estra pa sorteos. El procesu fáise al traviés de la propia web de musicasturiana.com y hasta’l 20 de mayu les tarifes d’apoyu van tar rebaxaes.
Con esti nuevu pasu, Musicasturiana.com va siguir trabayando pa dar respuesta a dalgunes de les carencies qu’esta escena tien anguaño. La web va ser una especie d’enciclopedia del sieglu XXI dedicada a la música asturiana, dando forma a un proyectu pioneru n’Asturies, con una ventana abierta a cualesquier requexu del mundu al traviés del click. Too ello dende una perspectiva empresarial profesional que puxa por reconocer el papel fundamental que tien la música con identidá propia dientro de la Marca Asturies.
Redaición InfoAsturies
This work is licensed under a Creative Commons Attribution 4.0 International License.
