Anque anicialmente l’intentu de negociación al traviés de Burofax fracasó, la campaña d’espardimientu peles redes del conflictu dio resultáu y l’abogáu  de COMETE Asturias, empresa a la que pertenez la Taberna Asturiana en Xixón, amás d’una decena de marques de comida a domiciliu y dos reconocíos establecimientos n’Uviéu, solicitó un conceyu p’apautar una solución al conflictu.

Nel aconceyamientu la postura de los trabayadores y del sindicatu foi nun baxar nin un céntimu les sos reclamaciones, “yá que nun ye una cuestión de dineru nin de cifres concretes sinón de dignidá, y eso nun se rebaxa”.

Finalmente, la empresa aceutó abonar el total de les cantidaes reclamaes por impagos. Lo que se reclamaba yeren les hores estres trabayaes por dos emplegaos en La Taberna Asturiana, asina como la diferencia de salariu ente la categoría que teníen nos sos contratos, dambos “ayudantes de camareru” ensin camareru al qu’ayudar, y la que llevaben a cabu realmente, camareru y xefe de sala. Esto facía un total de cerca los 7.000€.

Les cantidaes yá foron abonaes y poro el conflictu queda preslláu ya’l boicot finalizáu. El sindicatu anuncia que tan en negociaciones con otra empresa pa presllar un alcuerdu asemeyáu, pero nun dan el nome del establecimientu, una bones esperen algamar ensin falta d’ello el 100% de les revindicaciones.

Tres de les victories algamaes llantando cara a la patronal hostelera, dende CNT hostelería  animam a los trabayadores, “yá seyan d’hostelería o d’otros sectores, a llantar cara a los abusos, porque ye’l momentu de facelo y unes vegaes más discretamente y otres más públicamente, tamos demostrando que puede parase el deterioru de les nueses condiciones de trabayu (y por tantu de vida). Nun son especulaciones, ye una verdá: Organizaes somos más fuertes. Tu escueyes”.