Calcúlase que pal 2035 va haber un 23% más de mayores de 65 años que güei, un de ca tres asturianos va superar los 80 años. Namás el 30% de les places xeriátriques disponibles son públiques

Los xeriátricos privaos vieron la posibilidá de mercáu que l’avieyamientu de la población asturiana representa y planteguen abrir nos próximos 20 años más de 2.900 nueves places n’Asturies. Básense para ello nel estudiu realizáu pola Conseyería de Drechos Sociales y Bientar, ‘Previsión de demanda de curiaos residenciales pa mayores n’Asturies’. Esti informe, sicasí, nun plantegó la necesidá d’aumentar nos miles de places necesaries la ufierta pública xeriátrica.

N’Asturies hai alredor de 12.500 places en residencies par mayores, una cifra que nos asitia n’una ratio llixeramente perriba la ratio de 5 encamentada pola OMS. Del total d’estes places residenciales, alrodiu’l 70% correspóndese con places en residencies privaes, entantu que les restantes son places en residencies públiques. La diferencia qu’esto implica pal usuariu ta nel preciu, que varia de los aprosimao 570€ mensuales (el 80% d’una pensión normal) nun xeriátricu públicu a un preciu mediu que s’asitia ente los 1.300€y los 1.500€/mes nuna privada.
La patronal xeriátrica non solo plantega l’apertura de nuevos centros, especialmente nel Oriente y Occidente asturianos, sinón que reclama al gobiernu asturianu “financiamientu abondu”, ello ye, que soliciten que, en llugar de crease places públiques, s’invierta en conciertos financiaos de calter priváu.

Llucía F. Marqués