El tramu ye utilizáu a diariu por unos 2.500 vehículos, de los que 380 son camiones, según les caberes estadístiques del Ministeriu de Tresportes, siendo la principal carretera pa llegar a Uviéu, Xixón y Avilés dende’l surocidente asturianu. “Lo más grave” apunta un vecín “nun ye’l retrasu de la obra de la autovía, que lo ye, lo pior ye qu’un solu argayu estrangule les comunicaciones de toa una comarca, el Surocidente asturianu, d’un tamañu equiparable al de tol País Vascu. Urxe repensar y actuar sobre tou el sistema de comunicaciones del Surocidente”.

De momento pa llegar a Salas dende’l centru’l país, los vehículos llixeros tienen que dirixise nel enllaz de Doriga, a traviés de la AS-15 sentíu Cangas, pa desviase posteriormente en Soto los Infantes hacia Salas pela AS-226. Mientres, los vehículos pesaos deberán circular pola AS-15 sentíu Cangas  pa coyer l’AS-215 hasta El Crucero y dende allí la AS-216 a La Espina.

Cabe albidrar qu’esti nun va a ser el únicu argayu que va producise, nuna autovía  trazá  media lladera, nun tarrén xeológicamente non afayaizu pa soportar una infracadarma d’esta triba. Depués de los abondos argayos, los vecinos de la zona reconocen que sienten congoxa cuando tienen que circular pela carretera nacional. Consideren que los trabayos na autovía tan suponiendo un riesgu añadíu a una carretera costruyía sobre un tarrén que ye principalmente arenisca; les obres de fechu ya xeneraron dellos acidentes, esbarrumbando cases collindantes.

Vitor Corte