Los cuatro primeros meses del añu atropen yá más de la metá de los muertos n’acidentes nel trabayu de los que se producieron a lo llargo de tol 2020

Un gruista de 39 años morrió na tarde d’ayeri tres d’un accidente nes instalaciones del estelleru Armón, en Xixón.

El fináu, que trabayaba pa la empresa Macomli, foi treslladáu darréu al Hospital Universitariu Central d’Asturies (HUCA), pero’l traumatismu cranoencefálicu, causáu pola caida na tiesta d’un tubu d’unos cincuenta quilos de pesu, resultó lletal. Les primeres informaciones señalen que los fechos produxérense mientres la execución d’una maniobra cola grúa con control remotu, cuando parte de la carga, consistente en tubos, soltóse.

Los dos primeros meses del añu dexaron un saldu de 7 accidentes fatales. A principios d’esti mes anunciábase la muerte d’un trabayador de la compañía RUSTE na planta agropecuaria de Parees (Sieru) y marzu estrenárase col fallecimientu d’un trabayador de ArcelorMittal na factoría d’Avilés. La d’esta selmana arredondia la cifra a diez.

Redaición InfoAsturies

This work is licensed under a Creative Commons Attribution 4.0 International License.