Asturies entamó’l cursu 20/21 con 82 puestos de Pedagoxía Terapéutica y 69 especialistes n’Audición y Llinguaxe menos, solventándose esi amenorgamientu de personal con horarios y criterios restrictivos que perxudicaben tanto a los docentes comu a los escolinos

Naquel intre, darréu la publicación de la circular d’aniciu de cursu, el Sindicatu Asturianu d’Ensiñantes SUATEA denunció públicamente los criterios dictaos nes istruciones pa ellaborar los horarios de les mayestres d’estes especialidaes, por considerales non solo restrictives y carentes de xacíu, sinón por perxudicar gravemente l’atención especializada del alumnáu.
Tantu la LOMCE (art. 71) vixente naquel momentu, como l’actual LOMLOE afiten, amás del principiu d’inclusión, que correspuende a les Alministraciones educatives asegurar los recursos necesarios pa que los escolinos que riquieran una atención educativa estremá a la ordinaria puedan algamar el másimu desendolcu posible de les sos capacidaes personales y, en cualisquier casu, los oxetivos afitaos con calter xeneral para tolos escolinos. Y esto recuéyese, amás nel testu de la Convención de Nueva York sobro los drechos de les persones con discapacidá, ratificau en 2007.
“Lo que reclamaron, per un lláu, les families, comu drechu fundamental de les sos fíes y fíos, como, per
otru, el mesmu profesoráu y SUATEA, yera a cencielles eso, que se fixera cumplir la Llei enllugar d’acutar l’atención especializada, inventándose criterios pelegrinos nuna circular. Resulta llamentable que l’actual Conseyería, según les anteriores, prefiriera faer casu omisu de les reclamaciones que  lleva años faciendo la comunidá educativa en contra de los criterios economicistes impuestos p’aforrase mayestres de PT y A EL y, con ello, precarizar l’atención educativa del alumnáu que más lo precisa, neto que les condiciones llaborales d’estes especialistes” declaren dende SUATEA.

El sindicatu demandó xudicialmente estos fechos y cellebren la sentencia del Tribunal Cimeru de Xusticia de Asturies, que declara illegal dellos de los criterios incluyíos na circular d’entamu de cursu y desixen que se tenga ello bien en cuenta na redaición de futures normatives sobro inclusión y equidá educativo.

Redaición InfoAsturies

This work is licensed under a Creative Commons Attribution 4.0 International License.