• Portada
  • >
  • Llingua
  • >
  • Educación nun aceuta les titulaciones B2 qu’ella mesma convocó y certificó

Educación nun aceuta les titulaciones B2 qu’ella mesma convocó y certificó

  • 12 Abril, 2021

La non aceutación del B2 d’asturianu, certificáu dientro’l Marcu Européu de les Llingües, por parte de la Conseyería d’Educación ¿neglixencia o mala fe? 

Los esámenes pal B2 n’asturianu, cellebraos por primer vegá l’añu pasáu y con una demanda mui superior a les places disponibles, foron recibios como un emportante pasu alantre na normalización llingüística, el primer reconocimientu de la conocencia del asturianu dientro’l Marcu Européu de les Llingües.

Dientro’l mesmu camín, en marzu d’esti añu anunciáronse les prebes de competencia llingüística n’asturianu nos niveles B2 y C1, que se van cellebrar na seronda d’esti añu 2021.

D’ente les persones qu’algamaron el B2 munchos pertenecen al cuerpu docente, polo que presentaron  énte la Conseyería d’Educación la so solicitú d’inclusión d’esta nueva titulación nel rexistru  personal de formación permanente que tien la Conseyería pa ca profesor, un rexistru con importantes efeutos a nivel llaboral, comu’l reconocimientu de méritos pa oposiciones, concursu de tresllaos y complementu salarial de formación permanente.

Sicasí, esperába-yos una desagradable sospresa, nun enésimu ataque asturfóbicu la mesma Conseyería d’Educación que convoca, evalúa y certifica les prebes de competencia llingüística sometíes a la normativa europea, desestimó la so pitición en base a una tecnicismu llegal “por escarecer de la documentación requerida pola normativa vixente, a saber, un títulu oficial de les Escueles Oficiales d’Idiomes o un resguardu d’elli”, titulación que nun pueden aportar porque, cenciellamente, nun esiste. Y nun esiste porque ellos nun quieren.

El casu ye asemeyao a los títulos d’Espertu y Especialista en llingua asturiana otorgaos pola  Universidá d’Uviéu, que pola so duración equivaldríen a los actuales títulos de máster y que tampoco son reconocíos con esti nivel.

Pal sindicatu d’ensiñantes asturianu, SUATEA, “ello rescampla’l despreciu manteníu nel tiempu col que trata l’ Alministración asturiana al interés, la ilusión y el compromisu de munches persones asturianes, tamién del profesoráu, cola llingua asturiana. Ye más, vulnera los derechos llingüísticos fundamentales recoyíos na nuestra llexislación, nos trataos internacionales y específicamente les recomendaciones de la Carta Europea de les Llingües Minoritaries”.

Tamién dende Andecha Astur ficieron declaraciones al respeutu, destacando la urxencia de conseguir una oficialidá “completa y real, que fine con estes situaciones de discriminación continua del Pueblu Asturianu y de la so llingua” destacando tamién la incompetencia y falta de seriedá d’una alministración incapaz de dotar de conteníu real a les sos mesmes aiciones. “Seya un casu de neglixencia o de mala fe, rescampla la completa falta de respetu  a los profesionales de la educación y a los asturianos en xeneral”.

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies