La fortísima cayía d’ingresos per parte de los negocios xixoneses, xunía a la negativa de la mayoría de los propietarios de los llocales d’amenorgar el costu de los arriendos ta llevando a decenes de  establecimientos al preslle
Ye ciertu que’l procesu de zarru de negocios yá se fixere notar anantes de la crisis derivada de la pandemia, pero ésta produxó un fuerte xorrecimientu de los mesmos. Los preslles perimetrales, los cambeos d’horarios y les restriciones nos pequenos comercios fixeron incaltenible la situación de munchos d’ellos, qu’amás debieron competir cola medría de la compra per interné, un vezu qu’enraigonó con fuercia mientres el confinamientu. Les inmobiliaries envaloren nun 40% el porcentaxe de llocales disponibles pal arriendu, la gran mayoría llibres dende va bien pocu tiempu.

Amás, puede reparase un cambéu nos allugamientos d’estos llocales vacíos, que van avanzando dende los barrios más periféricos hasta les zones más céntriques de la ciudá, nes que munchos zarros son en realidad tresllaos de los sos establecimientos a llocales menos caros, ante la imposibilidá de faer frente a unes rentes yá escesives primero que’l virus cutiera con tola so fuerza.

Arriendos d’ente 2.000 y 3.000 euros y propietarios que prefieren dexar los sos llocales vacíos primero que baxar les sos esixencies nun compaxinen bien con una dómina na que les cifres d’ingresos descienden a mínimos pola cayía de la capacidá alquisitiva de los ciudadanos.

Nuria Prendes