• Portada
  • >
  • Sociedá/Llaboral
  • >
  • Andecha Astur propón que nun puedan aceder a aides los empresarios hosteleros que nun cumplan el Conveniu Colleutivu

Andecha Astur propón que nun puedan aceder a aides los empresarios hosteleros que nun cumplan el Conveniu Colleutivu

  • 1 Abril, 2021

Pa la formación nacionaliega, la situación de precariedá ya illegalidá llaboral nel seutor de la hostelería ye mui anterior al andanciu del COVID19, pero la cris sanitario ta llevando la ya llaceriosa situación de camareros y cocineros a llendes incaltenibles, polo que desixe que se tomen darréu midies correchores d’esta llácara endémica qu’afeuta a decenes de miles d’asturianos.

“El gobiernu español y el de Barbón amosáronse mui sensitibles a los pidíos de los grandes empresarios de la hostelería, nun teniendo la mesma sensibilidá coles vindicaciones y necesidaes de los trabayaores del seutor y colos pequeños autónomos del mesmu”

Nel so comunicáu, recalquen que la hostelería en si mesma ta siendo castigá de continuo poles decisiones polítiques del gobiernu asturianu y español, que la demonicen y culpen de ser el principal focu d’espansión del andanciu, cuandu les midies sanitaries adoutaes pola hostelería son más severes que les qu’apliquen les autoridaes na xestión de los tresportes públicos y privaos de viaxeros . El dañu al seutor recae direutamente nos sos trabayaores y nos piqueños autónomos del mesmu, agravando la difícil situación llaboral que yá carecíen previamente y faciendo imprescindible, según Andecha Astur, la intervención del gobiernu pa correxir les inxusticies del mercáu llaboral hosteleru, con o ensin andanciu.

Pa ello, desixen a Adrián Barbón una riestra de midíes con rellación a la hostelería asturiana, munches de les cuales “sólo suponen el cumplimientu escrupulosu del marcu llegal anguañu vixente, incumplíu con descaru y permisividá dende la so esistencia”. 

El  Conveniu Colleutivu d’Hostelería d’Asturies data de 2009 y venció en 2011 y les sos Tables Salariales nun se meyoraron dende’l 2011, pòlo que la so anovación ye imprescindible. Sicasí, de pocu val camudar el conveniu si nun se cumple, polo que Andecha reclama que se tomen les midíes necesaries pa garantizar el cumplimientu del Conveniu Colleutivu d’Hostelería, del Estatutu los Trabayaores y del Alcuerdu Llaboral Estatal d’Hostelería. Ello implicaría cuestiones comu el fin de les hores estraordinaries impagaes, de los festivos impagaos,  de les hores nocherniegues impagaes, el respetu a los horarios y categoríes fixaos en contratu o asegurar que s’esfruten los díes de descansu, pente otres munches cuestiones.

Comu midía correchora de l’actual situación d’incumplimientu xeneralizáu proponen, amás de polítiques d’ispeición fiscal y llaborales eficaces, que les empreses o empresarios autónomos d’hostelería nun puedan algamar aídes públiques si foron condergaos por delitos contra los trabayaores o contra l’erariu públicu, ello ye, por incumplimientu del Conveniu Colleutivu, por impagos a los trabayaores, por fraude a la TGSS, por tener trabayaores ensin asegurar o con xornaes illegales, por fraude nel rexistru de control horariu de los sos trabayaores, por impagu d’hores estraordinaries, por impagu de díes festivos, por nun respetar los descansos selmanales o’l descansu ente xornaes, pente otros.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies