Asturies perdió l’añu pasáu 9.641 moraores por causes vexetatives. Xineru entama’l 2.021 con una perda d’otros 1.117
En total, a lo llargo l’añu pasáu, Asturies sumó 14.570 defunciones, la mayor cifra de muertes rexistrada na serie hestórica, dende que s’entamaron a recoyer datos nel añu 1.980; 1.370 d’estes muertes foron direutamente causaes pol Covid 19. La cifra de ñacencies tamién batió records, nesti casu inferiores, al contabilizase namás 4.929 partos, baxando por primer vegá de los 5.000 añales. La perda de población por causes vexetatives saldóse nel 2020 con una perda de cuasi diez mil asturianos, la peor cifra conocía, superando los datos del 2019, cuando se recoyó un saldu vexetativu negativu de 7.742, datu que ya se consideraba llaceriosu nesi sen. Esta tendencia, lloñe de revertise, apiora col entamu l’añu 2021. Asturies perdió nel primer mes del añu 1.117 habitantes en xineru por causes vexetatives.
Pesia toles bromes sobro’l xorrecimientu los embarazos causaos pol confinamientu, 9 meses dempués de la obligación de tar empresllaos en casa los ñacimientos n’Asturies foron escasamente de diez diários, namás 324. Esto implica un amenorgamientu del 34’1% respeutu al primer mes del añu pasáu.
Nel mesmu mes, acordies a los datos apurrios pola Sociedá Asturiana d’Estudios Económicos ya Industriales (Sadei) Asturies rexistró un total de 1.441 defunciones, -un 2’1% más qu’en xineru del añu 2020- de les que 221 debiéronse a casos de Covid-19. Ello ye, qu’el númberu de fallecimientos cuadriplica llargamente al de ñacencies. A ello hai que sumar la perda de población pol saldu migratoriu, del que, seique entá nun se cuenta con datos concretos, sábese que ye tamién negativu.
Llucía F. Marqués
This work is licensed under a Creative Commons Attribution 4.0 International License.
