• Portada
  • >
  • Sanidá
  • >
  • La chapucera xestión del Covid xenera desconfianza na población

La chapucera xestión del Covid xenera desconfianza na población

  • 9 Marzu, 2021

Lo que vien darréu ye un rápidu repasu a delles noticies -toes elles de la cabera selmana- que ponen de manifiestu la distancia pente los datos oficiales/informaciones de prensa y los datos reales percibios de primer man polos protagonistes, una situación que se repite de continuo dende l’entamu l’andanciu y que xenera una fuerte sensación de desconfianza pente los asturianos

Trabayaores de clíniques privaes denuncien qu’apaecen comu oficialmente vacunaes, seique nun recibieren siquier la primer dosis de la vacuna dala nin tienen cita pa recibila.

Sanitarios de Piloña, conceyu en situación d’altu riesgu, informen d’once PCR positives el mesmu díe que les informaciones oficiales destaquen un únicu contaxu nel conceyu.

Escolinos xixoneses siguen diendo a clas pesi a los positivos de dellos de los sos profesores; les families nun son informaes y entérense del motivu de la baxa a posteriori, cuando los docentes tornen de la cuarentena. A los rapacinos nun se-yos faen prebes.

Barbón anuncia la meyora de los datos n’Asturies nel mesmu fin de selmana que sanitarios en primer llinia del HUCA viven una emportante subida de la presión hospitalaria.

Nel seutor priváu nun tan vacunándose los mélicos n’activu de más de 55 años. Tampocu recibirán vacuna, por agora, los profesores mayores d’esa edá.

Les vacunaciones de docentes, pospuestes pa vacunar primero a policíes y guardia civiles, ralentícense pola creación d’un nuevu ficheru de datos, cuando ya ta en manes de la conseyería un llistáu completu colos correspondientes permisos de llei de proteición de datos dende entamu de cursu. Los profesores consideren que ye un procesu de retardu alministrativu ante la escasez de vacunes.

El 26 de febreru anúnciase la entrada en fase de vacunación pal grupu 5 B -de 70 a 79 años-   cuando se tien conocimientu de decenes de persones de más de 80 ya incluso de 90 años qu’entá nun recibieron dala notificación pa dir a poner la primer dosis de la vacuna.

L’aparatu de publicidá del Gobiernu d’Asturies tamién entama a tener resquiebres, al facese público qu’Asturies ta nel puestu 15 -con namás tres comunidaes per detrás- no que cinca a porcentaxe de vacunaciones, depués de meses de propaganda trunfalista de Barbón presumiendo de ser el territoriu con mayor velocidá de vacunación del Estáu.

 

Nuria Prendes

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies