FETEAS y Cuatro Gotes Producciones graben un proyeutu audiovisual de radioteatru pal Día Mundial del Teatru, que tendrá de cellebrase telemáticamente
La Federación d’Asociaciones de Teatru del Principáu d’Asturies (FETEAS), en collaboración con Cuatro Gotes Producciones, ta desendolcando un proyectu audiovisual de radioteatru como contribución a la propuesta d’Escenamateur de cellebrar, de forma telemática, el Día Mundial del Teatru, el 27 de marzu.
Dende la selmana pasada, una docena d’actrices y actores d’estremaos grupos teatrales de toa Asturies ta trabayando’l guión “L’Antroiro” de Sergio Buelga, director del proyeutu. La pieza va grabase esti próximu sábadu 6 de marzu, a partir de les 10 de la mañana, nel estudiu de la productora audiovisual (cai Emilio Tuya, 51, L’Arena, Xixón), nun actu abiertu a la prensa.
El guión propuestu ye l’adaptación del cuentu policiacu homónimu ambientáu nel conceyu d’Allande que surdió como rempuesta a la iniciativa de creación narrativa n’asturianu “78 crímenes, 78 conceyos”, d’Ediciones Radagast.La grabación d’esta pieza de radioteatru va completase con un documental del procesu de creación, grabación y edición y coles impresiones de los participantes.
Redaición InfoAsturies
This work is licensed under a Creative Commons Attribution 4.0 International License.
