El Gobiernu d’Asturies yá dio en regalar a les empreses llétriques una prórroga na validez de les autorizaciones ambientales que teníen aprobaes para los sos numberosos parques eólicos y agora fálase d’ampliar la permisividá de les condiciones pa dellos conceyos del Sur Ocidente, onde yá esisten numberoses istalaciones furrulando, proyeutaes o en costrución

L’anunciu del cambéu de les Directrices Seutoriales d’Ordenación del Territoriu pa l’aprovechamientu de la enerxía eólica espublizáu nel Bopa nun respuende a los allegamientos presentaos na fase de consultes polos ecoloxistes, aprebándose una propuesta de cambéu de la llei pa la istalación de parques eólicos en zones anguañu escluyíes polos sos valires naturales o arqueolóxicos, que beneficiaría a llétriques ya intermediaries con un enorme costu para’l padremuñu asturianu.

Con esta reforma abriríase la puerte a la istalación de los mesmos en territorios protexíos, non solo a nivel nacional, sinón internacional al ser munchos d’ellos catalogaos como LIC (llugares d’importancia comuñal) pol so potencial contribución a restaurar l’hábitat natural, incluyendo los ecosistemes y la biodiversidá de la fauna y flora monteses.

Asturies yá carez les consecuencies de la fiebre’l vientu, una fonte d’enerxía primeramente favoratible al mediu ambiente por ser 100% anovable, pero que dexa de selo cuando pa la so istalación s’estrocen irremediablemente ecosistemes, paisaxes y bienes culturales de valor inestimable. Anguañu n’Asturies furrulen una ventena de parques eólicos, a los que se suma otra docena en costrución y delles decenes de  proyeutos de nuevos parques. Esta tramitación estazada del esplegue de la enerxía eólica n’ensame de pequenos proyeutos implica la perda de la necesaria visión global, inorando l’efeutu acumulativu y sinérxicu de la istalación de numberoses decenes d’aeroxeneradores, llínees llétriques y subestaciones llétriques, frayando’l sentíu de la Evaluación Ambiental Estratéxica que les direutives comuñales afiten y pudiendo suponer, según la CEA, un fraude de llei énte la lexislación d’impautu ambiental (tantu de planes como de proyeutos).

Redaición  InfoAsturies

This work is licensed under a Creative Commons Attribution 4.0 International License.