• Portada
  • >
  • Asturies
  • >
  • Andecha Astur urxe al Principado qu’actúe pa recuperar los bienes asturianos Inmatriculaos pola Ilesia Católica

Andecha Astur urxe al Principado qu’actúe pa recuperar los bienes asturianos Inmatriculaos pola Ilesia Católica

  • 4 Marzu, 2021

Ante’l compromisu del Gobiernu Español d’espublizar un llistáu y abrir un periodu de reclamación pa la recuperación de los bienes inmatriculaos pola Ilesia Católica, Andecha Astur pidi al “Principado” que se prepare pa reclamar tolos que pertenecen al Pueblu Asturianu

El llistáu de bienes inmatriculaos indebidamente pola Ilesia Católica n’Asturies supera les mil quinientes propiedaes, incluyendo la mayor parte los monumentos del Arte Asturianu y bienes inmuebles ensin venceyu relixosu dalu. La mayoría d’elles son llexitimamente propiedá del pueblu, a quien tienen de volver los drechos sobre elles, pa lo que sedría preciso que los sos representantes llegales, ello ye, el “Principado” y los respeutivos Conceyos, los reclamen. P’Andecha Astur, de nun facelo, sedríen cómplices del procesu d’aprobación indebía por inmatriculaciones protagonizáu pola Ilesia católica n’Asturies.

De fechu, denuncien, el Gobiernu d’Asturies nun s’opuso nel so momentu al procesu d’inmatriculaciones, siendo parte mui activa nel posterior procesu d’ocultación y enguedeyu, al nun facilitar enxamás unos llistaos completos y claros, inorando y dando llargues a les pidiciones del Grupu d’Inmatriculaciones d’Asturies y d’Andecha Astur, que llegó a denunciar ente la Unesco l’apropiación del prerrománicu asturianu, y protagonizó estremaes iniciatives al respeutu.

Apelen a la responsabilidá d’Adrián Barbón, comu Presidente, Berta Piñán, comu Conseyera Cultura, y Rita Camblor, comu Conseyera Presidencia (con competencies en Xusticia), pa que demuestren que’l Gobiernu asturianu nun sigue siendo cómpliz activu d’estes apropiaciones indebíes, presentando énte la Xunta Xeneral tanto un llistáu completu y correchu de los bienes inmatriculaos, asina comu un plan específicu pa la recuperanza de los bienes asturianos que la Ilesia católica incautó. “En casu de nun cumplir con estes responsabilidaes, los tres prestaríen un meyor sirviciu a Asturies si abandonaren los sos cargos”.

El restu de los grupos participantes na Xunta Xeneral tamién tan llamaos a participar nesti procesu “Asturies nun pue permitise qu’una tema d’esta importancia política, social, cultural y económica, seya oxetu de minialderiques intermitentes qu’enxamás algamen una solución política final, que resulte favoreceora pa los intereses públicos asturianos. Nin, por supuesto, de pautos tácitos ente gobiernos cómplices cola Ilesia católica” declaren dende la formación nacionaliega, que reclama a l’alministración asturiana que se pongan a trabayar darréu nun llistáu completu de los bienes y a preparar les reclamaciones xudiciales de toos ellos, ya qu’entrar na reclamación xudicial individualizá de caún de los bienes incautaos pol Vaticanu sedría “tan imposible ya inabarcable comu impresentable, porque se partiría de reconocer la propiedá eclesiástica”.

Andecha Astur pidi tamién que los poderes públicos asuman la so obligación d’aperiar con urxencia un marcu llexisllativu que permita la espropiación de tolos bienes inmatriculaos pola Ilesia católica, convirtiéndolos darréu en bienes de titularidá pública, ensin que proceda indenización denguna y que l’Estáu español rescinda darréu’l Concordatu col Estáu`l Vaticanu, dando acabu a les rellaciones privilexaes que dende’l reináu d’Isabel II de Borbón (más tardi Franco, Juan Carlos I y Felipe VI) vien prestando l’Estáu español, vía concordatos, a la sociedá d’intereses y negocios privaos que representa la Ilesia católica.

Nuria Prendes

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies