El númberu de paraos n’Asturies xubió en cuasi 13.000 nel caberu añu, siendo les cobertories por desemplegu más baxes que na década anterior
Muyeres, mocedá en busca’l so primer emplegu o paraos de llarga duración con más de 45 años son los principales perxudicaos d’esta costante cayida del emplegu que suma n’Asturies un total de 112.343 persones, incluyendo les que s’alcuentren en situación de desemplegu (85.781), les que siguen acoyíes en ERTE (17.993) y les prestaciones de trabayu autónomu por imposibilidá de desenvolver el so trabayu (8.569).
Namái a lo llargo’l mes de febreru, 1.087 asturianos pasaron a engrosar les llistes del paru, fasta algamar los 85. 781, 12.841 más que va un añu. D’estos paraos, más de la metá nun reciben prestaciones y aquellos que les reciben cobren importes desactualizaos, inferiores a los que se percibíen va diez años, polo que la so capacidá alquisitiva ye bien inferior a entós. Poro, dende los sindicatos apuren a actualizar l’Indicador Públicu de Renta d’Efeutos Múltiples (IPREM), que s’utiliza pal cálculu de los sosidios “con cuenta de dignificar la vida de les persones ensin ingresos llaborales porque, amás de la crisis d’emplegu que carecemos, cobrar los 452 mensuales de sosidiu o los 833 de media de la prestación nun desincentiven pa na la busca activa d’emplegu”.
Estos datos son el frutu de décades de corruciones, desindustrializaciones y reconversiones, que rematen cola mal llamada “descarbonización” y que fixeron d’Asturies el paraísu de los fondos utre. Espeyen tamién l’alta vulnerabilidá del sector hosteleru y turísticu, sobro’l que se cientraron les polítiques d’emplegu del “Principado” nes caberes décade y qu’amás de xenerar trabayos d’enorme precariedá ye’l primeru en vese afeutáu énte cualquier tipu de crisis.
Nuria Prendes
This work is licensed under a Creative Commons Attribution 4.0 International License.
