Dende entamos del sieglu XX, la Cueva’l Pindal forma parte oficialmente del Padremuñu cultural asturianu, siendo declarada Monumentu Nacional yá en 1924. Ente los más de cuarenta motivos pintaos y grabaos nel so interior destaquen exemplos de la fauna de dómina prehistórica, como’l famosu mamut, el bisonte, el caballu, los cérvidos y, tamién, la esceicional representación d’un pexe

La presencia d’una esplotación de ganáu vacuno na rasa de Santu Medero (Ribedeva), afitá na redolada de proteición de la Cueva’l Pindal y averá al so accesu, podría tar estropiando cola contaminación xenerada polos animales les pintures rupestres de la mesma. Según informa la Coordinadora Ecoloxista d’Asturies, repárase’n que parte’l cuchu xeneráu polos animales entemezse col agua d’una llamarga asitiada na finca onde tán los cebadorios del ganáu. L’arramáu y les agües d’un regueru cercanu peneren al sosuelu d’esta zona kárstica, polo que pueden tar contaminando con materia orgánico la cueva con arte rupestre.

Poro reclamaron a la Conseyería de Cultura, Política Llingüística y Turismu, a la Conseyería de Mediu Rural y Cohesión Territorial, a la Confederación Hidrográfica y al Conceyu de Ribedeva’l preslle de la estabulacióny la llimpieza de la zona afeutá y una rempuesta sobro l’impautu d’esta contaminación  na cueva, que tendría de cuntar cola proteición derivaode la so reconocencia como Bien d’Interés Cultural pola Llei de Padremoñu Hestóricu dende l’añu 1985 y foi declarada Padremoñu Mundial pola UNESCO en 2008.

Redaición InfoAsturies

This work is licensed under a Creative Commons Attribution 4.0 International License.