• Portada
  • >
  • Cultura
  • >
  • Carlos Rubiera espubliza “30 Asturianaes”, una triloxía enciclopédica de l’Asturianada

Carlos Rubiera espubliza “30 Asturianaes”, una triloxía enciclopédica de l’Asturianada

  • 25 Febreru, 2021

Con esta obra preslla un ciclu de venti años d’estudiu y afondamientu na canción asturiana

El cantante y compositor xixonés Carlos Rubiera presenta estos díes 30 Asturianaes, una obra en formatu llibru más tres CDs col que pon el ramu a más de 20 años d’estudiu, revisión y composición nel ámbetu la canción asturiana.

Esti trabayu representa’l cumal de la so carrera comu cantante y compositor d’asturianaes, un estudiu que tien el so aniciu nes obres de los compositores y cantaores “clásicos” d’a entamos del Sieglu XX (Rodríguez Lavandera, Baldomero Fernández, Manuel del Fresno y otros) que supieron day a la tonada asturiana un  calter cultu.

En 30 Asturianaes Carlos Rubiera sigui la estela de los clásicos cola perspeutiva del tiempu actual.

Recuéyense nesta gran obra un total de 30 pieces vocales xunto con tres pieces istrumentales orixinales pa gaita, cuntando pa la so grabación cola collaboración d’un estraordinariu elencu de 27 intérpretes, pente los que s’alcuentren voces ya  músicos de tanta sonadía comu Jose Ángel Hevia, Maria José Hevia, Javier Tejedor, Xuacu Amieva, Mariluz Cristóbal Caunedo, Rafa Lorenzo, Diego Pangua o Llorián García.

Nel llibru axúntense les lletres de tolos cantares, la partitura de la “Marcha d’honor” compuesta por Rubiera y grabá por Hevia y dellos testos introductorios y biográficos escritos pol propiu autor y pol musicólogu y gaiteru Llorián García Flórez.

Comu valor añadíu, ca llibru va numberáu con una fueya de roble estampada a man y roblá pol autor, faciendo cada exemplar únicu.

La variedá estilística (tonada brava, ayerana, soberana, vaqueira, añada, dialogada, a capella, a la gaita…) la diversidá temática, la rigurosidá llingüística, los arreglos y fasta la esperimentación faen d’esti trabayu una especie d’enciclopedia sonora de l’Asturianada.

Redaición InfoAsturies

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies