Una selmana entera lleven empresllaos David Tejerina -Sidrería Canteli- y Toni Permuy -Toma 3-, sietes díes d’empreslle y llucha, pero tamién siete díes de solidaridá. Demientres esta selmana recibieron abondes visites, sobre tou de compañeros de profesión, pero tamién otres más especiales, comu la del coru Al altu la Lleva, que yos dedicó un conciertu personalizáu na ilesia. La presencia de la prensa foi tamién costante, amosándose contentos cola repercusión algamá nesi sen. Los que nun pasaron perellí foron los representantes del Conceyu Xixón nin del Principado, precisamente a quienes quieren facer aportar les sos revindicaciones, una riestra de propuestes que van más allá de les míseres ayudes económiques y que permitiría al seutor y a los sos trabayaores sobrellevar esta crisis.

Seique representen a la hostelería, el so compromisu ye pa con tola ciudadanía, recalcando que son munchos los seutores que de manera subisidiaria se ven afeutaos poles restriciones a la hostelería -panaderies, empreses de llimpieza, caltenimientu de material hosteleru…- y remembrando que non solo los propietarios se ven abandonaos, sinon tamién los emplegaos de los sos establecimientos, que reciben -incluso los que tan contrataos en condiciones, daqué que non siempre ocurre na hostelería- pagues insuficientes, munches vegaes con meses de retrasu.  Demientres la so permanencia na ilesia recueyen alimentos pa repartir pente los movimientos solidarios qu’espontáneamente tan surdiendo na ciudá.

Güei, a les ocho y cuartu la tardi, asomaránse a la puerte la Ilesia San José, onde tienen istaláu un puestu d’información y venta de camisetes, y dirixirán unes pallabres a los xixoneses acomuñaos allí pa dayos el so sofitu. Darréu, camudarán el númberu nel contador, algamando la cifra de 7 díes, una selmana.