Hostelería con Conciencia pidi a Adrián Barbón que “baxe del so palaciu de cristal” y que se siente a falar cola xente pa poner en marcha midíes consistentes, que salven al seutor ensin poner en peligru la salú pública

Ayeri domingu tuvo llugar una nueva concentración  en solidaridá colos hosteleros zarraos na Ilesia San José (Xixón) y con tolos afeutaos polos preslles intermitentes, temporales y parciales de la hostelería que tán dañando, non solo a los mesmos negocios, sinón a bien de xente que d’una o otra mena dependen del seutor pa la so sosistencia.

Nes sos intervenciones los representantes de HCC criticaron la inconsistencia de les midíes que se tán tomando; pa ellos, abrir el día 20 precipitadamente nun ye más qu’otru pasu na cadena d’erros que caltien a la hostelería nun continuu abre-preslla que nun dexa caltener de pies los negocios nin controlar definitivamente les andaes.  Tonu Permuy, un de los zarraos, aportunó na so intervención en que dende HCC tán a favor del preslle por motivos sanitarios “igual que tendríen de presllar otros seutores, como  los tresportes públicos, centros comerciales y demás… pero nós nun tenemos la culpa de tar zarraos y desiximos unes contraprestaciones pa qu’estos preslles nun se conviertan en definitivos”.

Tocantes a les ayudes económiques pa desaniciar la situación, David Tejerina, que salió ayeri pente aplausos de la Ilesia, entrugábase porqué s’entardó un mes en sacar un borraor coles ayudes que, supuestamente, van abrir pa la so solicitú esta selmana y porqué nun s’escuchó la voz de los afectaos nin s’atendieron a les sos necesidaes.

De siguío, les más de cien persones que s’axuntaren p’acompañar a losempresllaos desplazáronse al Solarón, onde escribieron les sigles SOS con veles nel suelu, mientres encendíen antorches y farolucos voladores en solidaridá col sector hosteleru asturianu.

Llucía F. Marqués

This work is licensed under a Creative Commons Attribution 4.0 International License.