La emisión, el pasáu 5 de febreru, d’un especial dedicáu a dos de los grupos asturianos de mayor sonadía l’el ámito musical asturianu, Felpeyu y Llan de Cubel , causó indinación pente los espectadores, llegando a emitir un comunicáu los miembros del segundu grupu, retirando a la cadena’l drechu d’emitir los sos materiales ensin la so previa supervisión
Llan de Cubel, unu de los grupos de música folk más renomaos, non solo en Asturies, sinón nel mundu, que llegó a algamar el númberu 1 nes llistes de los EEXX del so estilu, con decenes de xires a los sos llombos y les meyores crítiques de tolos medios especializaos a nivel internacional, mereció, non ensin retrasu, un programa homenaxe na televisión del so país. La espectación per parte de los amantes de la música asturiana foi notable.
La decepción llegó cuando’l programa en cuestión resultó consistir nuna torpe compilación de videos musicales baxaos de Youtube, retayos d’una antigua entrevista ya imaxes d’un par d’actuaciones nes que collaboraben con otros grupos. Nel programa etiquetáronse como de Llan de Cubel imaxes que nun correspuenden al grupu y utilizáronse conteníos ensin autorización, demostrando que nos más de dos décades d’hestoria del grupu la TPA nun rexistró información nin imaxes del mesmu ya evidenciando la falta d’interés pola cultura asturiana de la cadena televisiva.
Tres de la emisión del programa los miembros de Llan de Cubel unviaron al presidente de la TPA una carta na que-y comuniquen el so sorpresa ya indinación pol programa, acusándolu d’absoluta falta de rigor y calidá, polo que-yos encamienten a retirar esti programa de “TPA a la carta” y a nun volver emitir dichu programa nin dengún otru conteníu rellacionáu con Llan de Cubel que nun cunte cola so supervisión previa y espresa autorización per escritu ”En prevención de que puedan producise mayores daños a la nuesa imaxe”.