5.309 grandes dependientes tán a la espera de la vacuna n’Asturies, de los que 705 nun van poder ser vacunaos al nun tar valoraos. Tamién s’esclúi a les cuasi 6.000 curiaores non profesionales que tendríen de ser vacunaes por tar curiando a les persones grandes dependientes
La vacunación de los grandes dependientes (Grau III) que viven nes sos cases (Sanidá nun sabe esactamente cuántos son) ta entá por entamar y nun ta claro cuando van poder inmunizase, anque al formar parte esti colectivu de la Fase 1 del plan del Ministeriu de Sanidá, les 5309 persones grandes dependientes que nun tán en residencies tendríen de ser vacunaes nes prósimes selmanes. Otres más de 700 nun van poder vacunase, pesi a la so dependencia, al nun saber l’Alministración quién son por nun tar valoraes nin tener resolvimientu, ye dicir por atopase na llista d’espera, situación na que s’alcuentren arodiu del 13% de los grandes dependientes GIII asturianos.
Estes persones queden n’una especie de llimbu nel que dependen de qu’un mélicu o mélica, ensin cualificar en valoración de la dependencia, acredite que les sos enfermedaes riquieren sofitos pa la vida diaria. Per otra parte, magar la so vulnerabilidá manifiesta, nun s’inclúi nesta fase de les vacunaciones a persones dependientes severes de Grau II.
Tampocu va tenese’n cuenta a les aprosimao 5.924 persones con prestación económica par curiaos na redolada familiar (PECEF), curiaores non profesionales, que tendríen de ser vacunaes por tar curiando a les persones grandes dependientes. El 75% de les persones cuidadores non profesionales son muyeres.
Redaición InfoAsturies
This work is licensed under a Creative Commons Attribution 4.0 International License.
