Anguañu hai más de 6000 aeroxeneraores  istalaos a lo llargo de la Cornisa Norte, dende Galiza a Euskadi. El nuevu plan d’Enerxía prevé triplicar esa cifra pal añu 2030, lo que va repercutir nun enorme impautu n’ecosistemes y paisaxes

Dende la Plataforma pa la Defensa’l Cordal Cantábricu nun alderiquen la necesidá d’una transición enerxética con fontes anovables, pero aportunen en qu’esta transición enerxética nun puede significar la destrución de paraxes únicos y denuncien que’l nuevu plan d’enerxía va apurrir enormes beneficios a les corporaciones a cuenta de la destrución d’ecosistemes y paisaxes. La transición enerxética, aporfien, tien de ser ecolóxica y xusta col mediu ambiente y la sociedá nel so conxuntu, daqué que contrasta col ábanu de proyeutos de parques eólicos, la gran mayoría en montes y paraxes d’altu valir ecolóxicu y paisaxísticu.

Poro, la Plataforma pa la Defensa’l Cordal Cantábricu desixe una planificación rigorosa y una zonificación de calter venceyante, frente a la orientativa que presentó’l Miteco n’Avientu, que contemple áries d’esclusión que dexen fuera de la planificación aquelles zones d’altu valir ambiental y paisaxísticu. El Parque Natural de Les Ubiñes-La Mesa, L.laciana, Altu Ayer, Somiéu, Teberga, Quirós, Los Ozcos, El Sueve, El Cuera, Villamayor, Degaña, Babia, Alto Narcea, Ibias, la Cuenca del Esva o Ponga son dalgunos de los allugamientos propuestos pa la istalación de molinos eólicos.

Llucía F. Marqués