Depués de la incorporación de Cabrales el pasáu mes d’Avientu, cola futura aprebación de la toponimia de Pravia sedríen ya 68 los conceyos cola toponimia asturiana reconocía comu oficial
David Álvarez, alcalde de Pravia, vien d’anunciar que ta a piques d’unviar a la Conseyería de Cultura, Política Llingüística y Turismu la documentación que completa l’espediente d’oficialización de la so toponimia tradicional. Con ello, una bones seya aceutáu, sedríen namás diez los conceyos que tienen pendiente dar el pasu pa cumplir la direutiva incluyía na Llei de Promoción y Usu del Asturianu, que data del añu 1998, y qu’afita la necesidá de recuperar los topónimos tradicionales del país, españolizaos en bona parte.
La creación nel 2004 de la Xunta Asesora de Toponimia abrió un procesu nel que los conceyos solicitaben la revisión de la so toponimia pa dar el pasu d’oficializar la tradicional y en mayu del 2005 espublizáronse nel Boletín Oficial del Principáu d’Asturies los primeros decretos de oficialización toponímica, correspondientes a los conceyos d’El Franco, Carreño y Llanes.
La oficialización de los topónimos del país implica la derogación automática de los españolizaos, pasando a ser los asturianos los únicos llegalmente válidos, daqué que’n munchos casos ta quedando en papel moyao, siendo asina que les propies alministraciones continuen utilizando de manera illegal los topónimos non oficiales.
Llucía F. Marqués
This work is licensed under a Creative Commons Attribution 4.0 International License.
