La Comisión d’Urbanismu y Ordenación del Territoriu d’Asturies (CUOTA) reconoció apocayá l’aplicación mientres siete años nel Conceyu de Llanes de criterios urbanísticos contrarios al ordenamientu vixente; sicasí, les denuncies retrotráyense al PGOU de 2003, anuláu nel 2011 pola presión d’Andecha Astur en comuña colos vecinos y grupos ecoloxistes
Foi la mesma comisión executiva de la CUOTA quien reconoz agora que se concedieron permisos para construyir fora de los núcleos rurales y n’allugamientos nes que s’estropió seriamente’l mediu ambiente.

Andecha Ástur, organización política qu’impugnó’l Plan Xeneral d’Ordenación Urbanística del 2003 de Llanes pol cúmulu d’irregularidaes urbanístiques que contenía, consiguiendo la so anulación definitiva per parte del Tribunal Supremu en xineru del 2012, recuerda que fueron abondo más de 7 años los que, tantu los responsables llocales como los del Principado, pasaron «prauticando una nefasta y destructora política urbanística y convirtiendo Llanes en referencia de la especulación, la destrución del mediu ambiente ya’l despotismu».

Un exemplu d’estes polítiques ye’l casu Kaipe, nel que finalmente foi obligáu’l valtu de l’ampliación del Hotel del mesmu nome, pol incumplimientu d’una riestra de normatives urbanístiques: primer llínea de sablera y reagrupación illegal de finques, ente otres. Sicasí, la empresa nun cometiera denguna falta alministrativa, yá que cuntaba con toles llicencies y permisos pertinentes, concedíos polos responsables municipales de la cuestión, polo que non solo nun fueron sancionaos, sinón que los llaniscos viéronse obligaos a pagar una importante indemnización a los sos propietarios.

Nuria Prendes