La Secretaría de la Muyer de SUATEA dedica namás un mes a les escritores n’asturianu nel Calendariu Coeducativu “Tiempu de muyeres, muyeres nel tiempu” qu’esti 2021 ta dedicáu a les muyeres escritores y que s’edita n’asturianu, español, catalán, euskera y gallegu

Güei a les siete la tarde i presentaráse’l Calendariu Coeducativu 2021. El mesmu, que se publica añalmente dende hai 17 años, dedícase a muyeres d’estremaos seutores y ye frutu del trabayu de la Organización de Muyeres de la Confederación Intersindical, a la que SUATEA pertenez. La so finalidá ye reconstruyir la hestoria incompleta tresmitida tanto en llibros de testu como nel currículum educativu, destacando la participación de les muyeres na vida pública: científiques, investigadores, artistes, filósofes, polítiques, periodistes, viaxeres, esportistes… nesti casu tóca-yos a les escritores. Acaldía contien efemérides con datos biográficos d’otres tantes muyeres feministes, de los sos llogros y la so llucha por algamalos. Amás, complétase con una guia educativa on line con información y actividaes rellacionaes coles escritores, disponibles en toles llingües del estáu, nos que se proponen idees para trabayar la tema de el escritores con escolinos d’ente cero y 18 años.

Nel mesmu apaecen escritores dende la Edá Media, cola apasionante hestoria de la princesa omeya Wallada bint al-Mustakfi que llogró la so independencia vendiendo los drechos reales heriedaos y esto dexó-y llibrase del matrimoniu y salir a la cai ensin velu, con versos bordaos nos sos vistíos, hasta l’actualidá, con escritores -toes elles n’español- de los sieglos XX y XXI. Les otres llingües del estáu, incluyendo l’asturianu, apínense nun únicu bloque ensin estremar dómines, nel últimu cuatrimestre. Al asturianu tóca-y un espaciu nel caberu mes, cola mención a Xosefa Xovellanos y Xove Ramírez, Enriqueta González Rubín y la Conseyera Berta Piñán.

Toles persones interesaes tienen a la so disposición la versión dixital descargable y la propuesta completa d’actividaes coeducatives colos sos respectivos recursos ya’l dossier de muyeres escritores tanto na web suateasuatea.org, como na páxina de la Organización de Muyeres organizaciondemujeres.org.

Redaición InfoAsturies

This work is licensed under a Creative Commons Attribution 4.0 International License.