• Portada
  • >
  • Sociedá/Llaboral
  • >
  • Diego Morís, responsable de la Estaya Llaboral d’Andecha Astur: “Les muertes nel ábanu de Rufrío tienen responsables políticos. Barbón sábelo, por eso calla”

Diego Morís, responsable de la Estaya Llaboral d’Andecha Astur: “Les muertes nel ábanu de Rufrío tienen responsables políticos. Barbón sábelo, por eso calla”

  • 18 Xaneiro, 2021

“El ´Principado` xuega a la ruleta rusa cola AS-253: altu riesgu y desatención d’estudios científicos”

Declaraciones de Diego Morís, responsable de la Estaya Llaboral d’Andecha Astur

El 1 de xineru hebio un tremendu ábanu na carretera AS-253, la que lleva de Cabanaquinta al Puirtu Braña (conocíu polos españoles comu Puertu San Isidro), al altor de Rufrío. Esti argayón de ñeve enterró a dos trabayaores del Sirviciu de Conservación de Carreteres del Gobiernu asturianu, César Fernández Ordóñez (53 años) y Virgilio García García (61 años). El cuerpu del primeru rescatóse esi mesmu díi, l’otru compañeru lleva desapaecíu dende entós.
Lo sosprendente que resulta’l silenciu del Gobiernu’l “Principado” sobro les causes d’estos fallecimientos, ye lo que mos lleva a entrevistar a Diego Morís, responsable de la Estaya Llaboral d’Andecha Astur.

– En cualisquier país onde dos trabayaores muerren n’acidente llaboral, amás con ún desapaecíu tantu tiempu, hai una información oficial sobro los fechos, ¿por qué creyes que nesti casu’l Gobiernu de Barbón escoyó’l silenciu?
– Sólo tán falando de lo abegosu que ye’l rescate. Y ye cierto. La situación na fastera’l Puirtu Braña ye enforma difícil, pola cantidá ñeve que foi argayando n’estremaes partes. Andecha Astur creye qu’hai de proceder al rescate del compañeru fallecíu, pero tamién se tien de facer cola prudencia necesario pa evitar más acidentes nel intentu. Sicasí, de lo que nun fala’l Gobiernu ye de si hai o non dalguna responsabilidá nestos dos fallecimientos n’acidente llaboral. Dende’l nuesu puntu vista, haila y ye mui grave. Los dos trabayaores morrieron por cumplir una orde llaboral que-yos tresmitíó’l Gobiernu de Barbón, al traviés de la Conseyería de Mediu Rural y Cohesión Territorial, qu’anguañu ye la competente en materia d’infracadarmes y rede viaria. Foi una orde que, contrariamente a lo qu’aconseyaben les circustancies climátiques y la situación del tarrén naquella fastera, la Conseyería nun interrumpió. Pero’l problema nun ye sólo que los mandaren a trabayar nuna situación y condiciones d’altísimu riesgu, sinón que’l Gobiernu d’Asturies persabíalo porque lleva xugando a la ruleta rusa con esta carretera dende hai décades.

– ¿Pues desplicamos esto cabero, qué pasa cola carretera que va al Puirtu Braña?
– Ye una vía de comunicación con un tráficu importante, muncho más en temporá d’iviernu. En 2012 yá tenía una intensidá media diaria de 567 coches, más 34 vehículos pesaos. Y nel iviernu estímase que tien un tráficu de 15.000 vehículos. Siendo asina, nesa carretera prodúcense varios ábanos (tamién dalgún desprendimientu de piedres de grandes dimensiones) ca añu. Los de 2005, 2008, 2009, 2013, 2017, 2018, 2019 y 2020 foron tan señalaos que les protestes de vecinos apaecieron en tolos medios de comunicación. Y nos caberos años hebio tres muertos, incluyendo los compañeros fallecíos en xineru; pero ye que si nun hebio más foi por casualidá, porque sábese de vehículos y presones que se llibraron d’un ábanu por mui pocu tiempu y perpoca distancia. Por eso Andecha Astur afita que’l Gobiernu del “Principado” lleva décades xugando a la ruleta rusa cola AS-253, y los xugaores obligaos a esta cruel práutica son los vecinos, los usuarios en xeneral de la vía y, por supuestu, tamién los trabayaores de caltenimientu de la mesma.

– ¿Y quién denuncia les males condiciones d’esa carretera, los vecinos?
– Sí, hom, los ayeranos son los principales conoceores del mal estáu de la vía en cuantes a midíes de seguranza. Pero yá nun se trata d’una denuncia popular. El Gobiernu de Barbón conoz dos estudios científicos sobre la carretera AS-253, los riesgos d’ábanos, les zones crítiques y les soluciones téuniques que proponen los espertos. Pero la irresponsabilidá de Barbón y la so Conseyería de Mediu Rural y Cohesión Territorial ye másima, porque ún d’estos estudios de la Universidá ye de 2019 y l’otru de 2020, pero naide nun fexo un res nesi gobiernu por dexar de xugar a la ruleta rusa cola población que viaxa per esa carretera, nin colos sos trabayaores. Esos estudios despliquen ñidiamente por qué ye una fastera con tantu riesgu d’ábanos, en qué llugares concretos hai riesgu y los niveles del mesmu, en qué situación d’utilidá y conservación s’atopen les midíes de proteición istalaes, y qué midíes de proteición sedríen bramente necesaries en ca puntu críticu. Tres lleer esos estudios ves cómu’l Gobiernu asturianu ta sometiéndomos al xuegu la ruleta rusa colos agravantes de neglixencia, imprudencia ya irresponsabilidá porque los científicos inventariaron y detallaron el mal estáu de conservación de les diferentes malles y barreres, de la presencia de midíes de proteición ineficaces en dellos llugares, de la falta de midíes n’otros, de la escasez de viseres antiábanos, de la falta d’una necesaria forestación…

– ¿El Gobiernu del “Principado” nun se mostró nunca dimpuestu a iguar esta sitación tan pelligrosa?
– Non. Los vecinos, los hosteleros, los usuarios de la AS-253 y l’alcaldía ayerana lleven munchos años pidiendo soluciones, aconceyándose con representantes del Gobiernu, denunciando la situación nos medios de comunicación… ensin resultaos. Siempres se vio que podría haber muertes; tovía en 2019, con motivu d’un argayón de ñeve qu’hebio, l’alcalde ayeranu pidía públicamente un plan antiábanos “pa evitar una llaceria, porque ye mester una igua urxente énte’l riesgu d’argayos”, dicía. Y nun hebio rempuesta oficial dala. Ye más, nos tiempos d’Areces, ésti tovía dicía que la carretera yera enforma segura, comu la rialidá amosó bien lo contrario, recularen y comu “gran esfuerciu” en 2009 llevantaren tres pequeñes viseres antiábanos, una midía que ye comu poner una tirita nel corte d’una arteria; ye más los propios vecinos dicen que dalguna d’eses viseres nun ta puesta nel llugar más indicáu.

– Entós, p’Andecha Astur, ¿hai responsabilidá política nel acidente de Rufrío?
– Evidentemente, la muerte de los dos trabayaores de carreteres ye responsabilidá política direuta del Gobiernu del “Principado” y de la so Conseyería de Mediu Rural y Cohesión Territorial. Ellos dieron a los compañeros la orde de dir a trabayar en condiciones de riesgu estremu. Ellos los caltuvieron na carretera fasta’l momentu l’acidente. Ellos inoraron los estudios científicos sobro la carretera. Ellos lleven décades conociendo que ye una carretera d’altísimos riesgos, con pelligru d’acidentes mortales, ensin istalar les midíes de seguranza necesaries y ensin caltener afayaízamente les qu’hai istalaes. Eses muertes tienen culpables. Y Barbón sábelo, por eso calla.

 

 

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies