Vicente Alberto Álvarez Areces (1943-2019) foi un conocíu dirixente del PSOE n’Asturies, alcalde de Xixón demientres doce años, presidente d’Asturies otros doce años topando finalmente abellugu en Madrid comu senaor. Tres de si dexó una ablucante estela de corrución que tendría de facelu pasar a la hestoria como ún de los mayores responsables del esfarrapamientu económicu, social, medio-ambiental y cultural d’Asturies. Sicasí, el Conceyu Xixón lleva alantre un concienciudu llabor d’esblanquiamientu de la so figura que tien un finxu más na asignación del so nome a una cai
De magar l’añu 1999, cuando entamó la so carrera política comu alcalde nel conceyu Xixón, fasta’l so caberu aliendu, Tini tapeció y facilitó l’espoliu sistemáticu al que la mafia PSOE-SOMA-UXT sometió al pueblu asturianu, asistiendo encantáu al desmantelamientu de la minería y la industria asturiana entantu repartía panchón colos suyos. Enxamás nun se-y pidieron llegalmente responsabilidaes y aportó al so caberu díi ensin dar cuentes de tou ello.
La trama mafiosa asturiana nun sedría posible ensin el conocimientu y participación de Tini, la so solombra en tolos casos de corupción n´Asturies yera pergrande: Casu Ayer, casu Aquagest, casu Cuideiru, casu El Musel, casu Grandas de Salime, casu Hulla, casu La Camocha, casu Riopedre, casu Zalia,casu Niemeyer, casu Villa…
Nun contentu con ello, sistematizó la represión llingüística, torgando la oficialidá y favoreciendo la galleguización del ocidente asturianu.
Sicasí, el Conceyu Xixón, col PSOE al frente, lloñe de facer que pague por tol dañu inflinxíu al Pueblu Asturianu, sigue col so procesu d’esblanquiamientu del pasáu del partíu y dedica-y un paséu, el de la playa Poniente, a un pasu de l’Avenida dedicá a otru corruptu y lladruepu d’entá mayor calibre, Juan Carlos I, cai a la que’l conceyu prometiere camudar el nome, a pidición d’Andecha Astur ya’l coleutivu Asturies nun tien Rei, ensin que la promesa se cumpliere.
Llucía F. Marqués
This work is licensed under a Creative Commons Attribution 4.0 International License.
