• Portada
  • >
  • Sanidá
  • >
  • Desmontando’l falsu alderique sobro la voluntariedá de les vacunes

Desmontando’l falsu alderique sobro la voluntariedá de les vacunes

  • 5 Xineru, 2021

Ocupa les redes, con sofitu de la prensa, l’alderique cuasi continúu sobre la llexitimidá d’obligar a vacunase a quien nun quier versus l’egoismu asesín d’aquellos que tienen cierta prevención a la de poner una vacuna de la que malpenes esisten estudios. Con ello tenemos, gracies al enfotu polarizador de la prensa oficial y de les acertaes pallabres del insigne presidente, una nueva batalla pente bonos y malos cola qu’entretener a la población con deu acusaor, l’escenariu ideal pa despistar de la llamentable xestión de la sanidá asturiana. Unos cenciellos cálculos van amosar lo valero d’esti enfrentamientu, ya que’l problema tien perpocu que ver col querer o nun querer vacunase

Cuntábame un mélicu, bon collaciu, qu’esto ye comu tener diez mil persones morriendo de sede y una botella de llíquidu, que lo mesmo podría ser sidre qu’agua. L’alderique nun ta en si esi llíquidu ye bonu o non pa la deshidratación, nin si los afeutaos quieren o non bebela. El problema ye que nun hai abondo. Fecha esta introdución, paso a echar cuentes.

Asturies tien 1.019.993 moraores. La vacuna Pfizer necesita una doble dosis, colo que tamos falando de 2.039.986 vacunaciones. Repartíes en tol añu, considerando que nun s’apare dengún festivu nin fines de selmana, sedría preciso 5.589 vacunaciones al día.

El procedimientu de vacunación nun ye cenciellu: primero por que ca dosis vien perfechamente endolcada y una vegada abiertu’l recipiente, la prescripción mélica indica diez movimientos del frascu, disolver el conteníu pa obtener de ca recipiente cinco dosis, otros diez movimientos, estración de la cantidá esauta pa una dosis y finalmente si, la vacuna. O non, porque cuasi escaezo qu’anantes de vacunar ye obligatorio lleer a ca paciente la información completa de la mesma, posibles complicaciones y efeutos secundarios, pasando darréu a resolver dubies y roblar consentimientos, un procesu que ta durando una media de diez menutos.

En resume, siendo mui optimistes, tenemos una vacuna ca venti menutos por ca equipu, 24 en total pa una xornada llaboral. Sedríen precisos 233 equipos de vacunación con dedicación esclusiva y másima eficiencia les ocho hores demientres 365 díes. Ca equipu costa d’un mínimu de tres persones, colo que se precisa un continxente de 700 sanitarios contrataos ex-profeso pa conseguir finar les vacunaciones nun añu.

El fechu ye que nun se contrató nin una sola persona pa desendolcar esta xera, sinón que,  treslladando’l millagru de los panes y los pexes a la multiplicación del esfuerciu llaboral, la vacuna tan poniéndola los mesmos sanitarios que ya nun daben a bastu anantes de la crisis sanitaria y que se declararon saturaos anantes d’entamar la campaña de vacunación. Los mesmos que tendrán que dexar de facer el so trabayu avezáu o retrasar muncho, muncho, el ritmu de vacunaciones.

Pero tranquilos, porque tampocu por esto hai qu’esmolecese, porque comu tan arguyosu cacarexa Barbón, en namás una selmana tan ya consumies l’ochenta por cientu de les vacunes que se mos apurrieren por agora, un total de 9.707 persones en total que recibieron la so primer dosis-tornando a los cálculos aniciales, menos de lo que fadría falta vacunar en dos díes pa finar nun añu-. Asina que tranquilos, nun hai falta esmolecese porque la xente nun quiera vacunase, nin porque nun haiga personal nin medios pa vacunar, porque lo que nun hai son vacunes abondes.

Llucía F. M

 

This work is licensed under a Creative Commons Attribution 4.0 International License.

2 Comments Already

  1. Ye mui prestosu’l cálculu, namás hai una torga (piquiñina): nun ye necesariu lleer too eso xusto nel momentu de la vacuna, lléese enantes, de la que firmes el consentimientu. El llunes,en dos hores vacunáronse 60 persones en La Calzada y otres tantes nel Parque (Xixón) y de xuru que tamién en Uviéu, Avilés y otros sitios, toos trabayadores de residencies de vieyos, xente que se espón a enfermar y a la que los que facéis prestosos cálculos dais abondo noxu. Ye una pena que la verdá te fraye un bon argumentu, ho. Pa la prósima…

    • Nun soi a ver comu los tos datos refuten los cálculos, sigue siendo preciso facer munches más vacunes y sobre tou tener munches más vacunes -nuna selmana vacunáronse menos de 1100.000 persones, ye un datu, pa finar nun añu precisaben vacunase nuna selmana cerca de 40.000). Nun veo comu puede dar noxu a quienes trabayen nello, cuando foron precisamente sanitarios los que mos apurrieron la información y mos pidieron espardela pa facer ver que se precisen refuercios y apoyu, precisamente, pa nun s’arriesgar tantu a enfermar.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies