Coincidiendo col Día los Inocentes, la Coordinadora Ecoloxista d’Asturies entregó a Ecoembes la Bullada de Purpurina pol so llabor contra la natura y mediu ambiente asturianos
Por vixésimu ochavu añu consecutivu, la Coordinadora Ecoloxista d’Asturies fizo ayeri la entrega simbólica de la Bullada de Purpurina, “galardón” que reconoz el llabor y aciones d’empreses, istituciones y/o alministraciones que más destacaren nel so enfotu contra la conservación de la naturia ya’l mediu ambiente asturianos.
Comu vien siendo vezu, la decisión foi difícil y l’alderique llargu, ya que toles candidatures propuestes cuntaben con abondos méritos pa facese col premiu, siendo dalgunos de los propuestos pa la Purpurina veteranos nel so llabor, repitiendo candidatura dellos años, comu ye’l casu d’ArcelorMittal y la papelera naviega Ence. Esti añu tuvieren tamién nominaos el Direutor de Mediu Natural del “Principado”, el Conseyeru d’Industria, los Empresarios del seutor de los áridos y finalmente la empresa que se fizo cola Bullada, Ecoembalajes España, SA – Ecoembes
La Coordinadora Ecoloxista decidió otorga-ylu pola so estratexa de lobby xunto colos grandes productores y distribuyidores de plásticu y otros envases, comu responsable d’imponer los productos d’usar y tirar a los consumidores, al tiempu que desendolca un sistema de recoyía d’envases ineficiente que pon en pelligru’l mediu ambiente.
Denuncien con ello el “Sistema Integrado de Gestión” (SIG), que práuticamente otorga la esclusividá de la xestión de residuos de la industria embotelladora y gran consumu a Ecoembes, quien boicotea cualisquier intentu de reistaurar l’usu d’envases retornables que punxere la responsabilidá del recicláu de plásticos y cristales nos mesmos productores.
En pallabres de la Coordinadora, el SIG, dende la so condición de monopoliu, “impón les condiciones a los ayuntamientos que lo que reciben pola xestión de residuos, dende lluéu, nun cubre los costes que representa par estos la recoyía d’esos envases”.
La CEA destaca tamién la falta de tresparencia y rigor en cuantu al manexu de datos sobre los residuos recuperaos y reciclaos, boicoteando amás alternatives reales comu’l Sistema de Depósitu, Devolución y Retornu (SDDR) qu’incentiva la devolución ciudadana d’envases pa la so reutilización mediante la remuneración económica, como se facía va décades coles botelles de vidriu, y que ya se aplica n’abondos países con perbonos resultaos.
Por tou ello consideren a Ecoembes xustu acreedor del premio BULLADA PURPURINA 2020, que, entregáu nun día comu’l d’ayeri, nun ye denguna broma.
This work is licensed under a Creative Commons Attribution 4.0 International License.
