Declaraciones de Diego Morís, voceru de la Estaya Llaboral d’Andecha Astur
Diz vusté que “Nun podemos permitir qu’el Covid enmazcare’l procesu de desindustrialización y la presión patronal”. ¿A que desindustrialización se refier?
A la d’Asturies, un procesu que ya lleva décades en marcha pero que se ta acelerando nos últimos tiempos. El recién preslle patronal d’Arcelor, mandando a casa 320 trabayaores foi un avisu de lo que ta por venir, los 60 despidos de Vauste, los 110 despidos plantegaos por Imasa, el preslle d’Alcoa, o la situación a la que tan llevando a EHBI cara al so desaniciu, son espresiones del aceleramientu del procesu de desindustrialización que se vien aplicando n’Asturies, y qu’agora mesmo, cola prioridá social ya informativa del Covid tan dexándose nun segundu planu.
¿Cuál ye’l papel del “Principado” nesta situación?
El de cómpliz silenciosu que mira pa otru llau y desvía l’atención. Nesi sen, ye inxustificable la indiferencia ya incapacidá del “Principado”, que nun solo ye cómpliz de les polítiques del Estáu español p’Asturies, responsables de la destruición del texíu socio-económicu asturianu, sinon tamién d’un modelu d’esplotación llaboral que subvenciona, pero que nun regula nin controla.
Voi entrugalo d’otra mena. ¿Cuál tendría de ser el papel del “Principado” nesta situación?
Dende’l gobiernu d’Asturies tendría de defendese ensin esculpies la industria asturiana y los drechos llaborales de los asturianos, debía regular y controlar efeutivamente’l mercáu llaboral. En dellos de los conflictos que mencioné hai una implicación direuta del “Principado”, pero non a favor de los trabayaores.
Dende Andecha Astur consideramos que la situación xenerada pol andanciu nun ye esculpia pa consentir esti desaniciu y facemos un llamamientu a la defensa del puestu de trabayu y d’unes condiciones llaborales dignes, y desiximos al “Principado” qu’asuma les sos responsabilidaes y asuma la defensa de la industria asturiana y a los sos trabayaores, perriba de la so reinal sumisión a los mandatos del gobiernu central.
This work is licensed under a Creative Commons Attribution 4.0 International License.
