Alquilar un pisu de 50 metros cuadraos costaría a un perceutor del IMV cuasi el 100% de los sos ingresos

Ayeri aconceyávense decenes de persones a la puerte de Mari Luz, vecina d’Avilés y persona de riesgu por salú, pa torgar el so desallugu de la casa onde lleva tres años conviviendo cola so mascota, ensin lluz nin agua. Solo n’Avilés, otra familia foi espulsá del so llar no que va de mes ya’l pasáu un vecín vióse enfrentáu a la posibilidá de desfiuciu por una delda de 3 euros. Mientres insisten en que quedemos en casa,son munchos a los qu’echen de la suya y munchos más los que nun cuenten con medios pa consiguise una. Lloñe de baxar los precios de los alquileres, nuna Asturies progresivamente vacía y probe, con un importante parque de vivienda ermu destináu a la especulación, el preciu de los alquileres continúa medrando; un 0’4% esti mes, un 7’3% no que va d’año.

Acordies los nuevos datos, el preciu mediu d’alquiler de vivienda ta nos 7’78 euros por metru cuadráu, lo qu’implica cerca de 400 € por una casa de solo 50 metros cuadraos, cuasi’l 100% de los ingresos d’una persona que cobre l’IMV. Sicasí, el preciu nun ye la única torga a la de consiguir vivienda: les munches desixencies de les inmobiliaries y propietarios (nómina, pagu alantráu de dos o tres meses, avales…) faen imposible pa munchos asturianos en situación de precariedá conseguir un llugar onde vivir, un problema que ye círculu viciosu, ya que ensin un llar nel que morar en condiciones ye perdifícil conseguir un trabayu y muncho menos aforrar.

Nuria Prendes