El primer contautu col Anguleru, entá dende’l Mar de los Sargazos, aconceya a cientos de neños y neñes al traviés de videoquedada en facebook y Zoom
L’Anguleru ye de los pocos repartidores navidiegos que se dexen ver en públicu anantes del so díi de repartu, siendo’l so vezu pasar por abondos colexos, biblioteques y cientros culturales anantes de la so cita añal nel Botánicu de Xixón ya’l so desfile de la nueche de Nadal per San Esteban de Pravia. Esti añu les dificultaes p’alcontrase presonalmente colos rapacinos llevaron al Anguleru a buscar un mediu seguru y afayaizu pa que los neños pudieren contautar con elli dende cuasique un mes anantes del 24.
Ayeri mesmo tuvo llugar la primer videoquedada on line y nella participaron, dende los sos llares, más de doscientes families que pudieron falar presonalmente ya en direutu col Anguleru. Amás, demientres l’alcuentru l’Anguleru apurrió a tolos que lu quisieron el so númberu de Whatsup, pa que pudieren contautar en direutu ca vegada qu’asina lo necesitaren. A la llamada coneutáronse rapacinos de toles fasteres del país y parte l’estranxeru, ya que l’Anguleru reparte tamién a los neños asturianos que vivan desplazaos fuera’l país.
Nuria Prendes
This work is licensed under a Creative Commons Attribution 4.0 International License.
