• Portada
  • >
  • Sociedá/Llaboral
  • >
  • Trabayaores de CD y CRAD Asturies denuncien irregularidaes na aplicación de los protocolos de seguridá

Trabayaores de CD y CRAD Asturies denuncien irregularidaes na aplicación de los protocolos de seguridá

  • 1 Avientu, 2020

El coleutivu de el trabayaores de los Centros de Día (CD) y Centros Rurales d’Atención Diaria (CRAD) d ‘Asturies, dependientes de la Conseyería de Servicios y Bientar social, son coscientes de tar trabayando con persones d’un nivel de riesgu bien alto y desixen una rempuesta a l’alministración énte la difícil situación a la que s’enfrenten: Espacios amenorgaos, EPIs insuficientes y pocu afayaizos y amás, dificultaes pa cumplir los protocolos en casos d’andada, llegando a recolocase a emplegaes d’un centru zarráu por cuarentena a otru ensin face-yos siquier la PCR

Na llamada “segunda fola” de la pandemia pasaron a ser un serviciu esencial, altamente demandáu y valoráu poles families. Siguen al pie del cañón, magar la mala calidá y escasa cantidá de los EPIs proporcionaos poles empreses, les dificultaes inherentes a la mesma idiosincrasia de les persones a les qu’atienden y al entueyu d’aplicar los protocolos de protección en redolaes ensin habilitar pa ello.

El problema surde cuando se detecta un positivu rellacionáu con un centru; ponse’n marcha’l protocolu ya, en función de les circunstancies, o bien queda esa persona en casa y realícense PCRs na so redolada, o bien, cuando’l positivu convivió col personal y usuarios, actívase’l protocolu y ciérrase el centru por precuru, pa evitar un biltu. Nesti trabayu, los contactos son casi siempres estrechos y poro, les cuarentenes necesaries.

Ye ende onde entamen los problemes.  Un porcentaxe importante del personal de los centros de día trabayen pal “Principado” pero al traviés d’una empresa privada, de la qu’en munchos casos depende en bona midida la posible tramitación de la baxa.

Tán dándose numberosos casos nos que los mélicos niéguense a pidir una PCR y a tramitar la baxa, considerando que l’usu de mázcaru nel desempeñu del so llabor ye garantía abonda pa nun considerar estrechu’l contactu, y piden informe del serviciu de prevención de la empresa, que na mayoría de los casos nun lu remite, dexando al trabayaor ensin PCR, ensin poder trabayar y ensin baxa.

En función del centru diéronse diverses situaciones, dándose’l casu de dalgunos nel qu’el 10% de el trabayadores quedaron nesti llimbu, siendo numberosos los casos de baxes roblaes y dempués anulaes por informe desfavorable de la empresa. Al nun tener la baxa eses trabayaores (aportunamos, tres un contactu estrechu con un positivu y ensin realizar PCR) son asignaes a otros centros pa realizar sustituciones o son obligaes a coyer vacaciones.

Les trabayaores desixen darréu un protocolu claru que protexa tantu a personal como usuarios, prebes a tol personal implicáu en casu de positivu nun centru, realización de peñeraos pa evitar situaciones de riesgu y por supuestu, EPIs en condiciones.

Redaición InfoAsturies


This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies