• Portada
  • >
  • Mediu Ambiente
  • >
  • Les principales organizaciones ambientales asturianes soliciten la moratoria pa nueves instalaciones eóliques fasta que nun s’evalúe’l so impautu conxuntu

Les principales organizaciones ambientales asturianes soliciten la moratoria pa nueves instalaciones eóliques fasta que nun s’evalúe’l so impautu conxuntu

  • 19 Payares, 2020

L’impautu ambiental y paisaxísticu de les instalaciones eóliques, xuníu a los impautos de les sos infracadarmes acomuñaes, como pistes d’acesu, subestaciones lléutriques y llinies  d’evacuación, etc., ta causando una gran esmolición y alarma pente los coleutivos ambientales y la comunidá científica n’Asturies

Anguañu n’Asturies tan en furrulamientu alrodiu d’una  ventena d’instalaciones eóliques pa la produción d’enerxía lléutrica, y ta autorizada la puesta’n marcha d’otres tantes istalaciones eóliques,  en costrución. Amás, hai delles decenes de nuevos proyeutos en desendocu pal ocidente asturianu.

L’actual impulsu de la industria eólico enmárcase nel Plan Nacional Integráu d’Enerxía y Clima (PNIEC), a la gueta de consiguir pal 2030 un amenorgamientu d’un 23% de les emisiones de gases d’efeutu invernaderu (GEI) al respeutu de 1990 y que tien como oxetivu final algamar la neutralidá climática en 2050 y cumplir col Alcuerdu de París, amenorgando al 100% les emisiones. Pero esta necesidá indiscutible d’avanzar de forma rápida cola implantación de les enerxíes anovables y l’amenorgamientu de les emisiones, daqué que les organizaciones que roblen comparten, nun tien de dir en desterciu de la preservación del ricu padremoñu natural asturianu, y especialmente de la protección de la so diversidá biolóxica.

Poro, dende les organizaciones ecoloxistes d’ Asturies reclamen un modelu enerxéticu qu’anteponga l’amenorgamientu’l consumu y fomente l’aforru y l’eficiencia enerxética,  que busque la integración de la planificación enerxética y l’implantación de les sos istalaciones de produción col restu de planes estratéxicos seutoriales, buscando una interacción harmónica col Plan Estratéxicu de Padremoñu Natural y la Biodiversidá. “L’incrementu ensin planiar de la implantación de los parques eólicos supón un grave riesgu, yá que nun se ta evaluando afechiscamente l’efeutu sinérxicu y acumuláu que presenta’l conxuntu de pequenes istalaciones,  que presenten una clara fragmentación na so tramitación. Poro, tendría de realizase una Evaluación Ambiental Estratéxica del conxuntu d’istalaciones eóliques n’Asturies, yá que podría tar causando, ente otros impautos, la muerte de cientos d’aves y esperteyos protexíos por choque colos aeroxeneradores”.

Nel contestu estatal, en comunidaes autónomes como La Rioxa afitaron moratories temporales a la implantación d’instalaciones eóliques, dica que nun se realizara primeramente una planificación de la capacidá d’acoyida y les sos implicaciones ambientales. N’otros territorios, la moratoria impúnxose pola vía xudicial de la suspensión cautelar, como ye’l casu de Cataluña.

Les organizaciones ambientales consideren que n’Asturies tase a tiempu de realizar una planificación del esplegue d’esti tipu d’istalaciones cuntando con tolos axentes implicaos y con un analís pormenorizáu, non solo de los aeroxeneraores, sinón de tolos sos elementos acomuñaos como pistes, llínees lléutriques y subestaciones lléutriques.

Asina, los grupos que roblen soliciten al gobiernu autonómicu la declaración d’una moratoria de tolos proyeutos de parques eólicos n’Asturies previstos y en procesu d’autorización hasta que s’ellabore un Plan d’Ordenación de los Parques Eólicos que se someta a la preceptiva Evaluación Ambiental Estratéxica.

Redacción InfoAsturies


This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies