Dalgunes clases continúen ensin profesor/a dende l’entamu de cursu ya en dellos colexos meciéronse los escolinos que tienen de llingua colos de cultura asturiana, suprimiendo la ensiñanza del asturianu o dándose dambes simultaniamente
Iniciativa pol Asturianu denuncia qu’estudiantes d’asturianu siguen ensin profesor a estes altures del cursu. La organización recibió varies quexes d’estremaos cientros d’Asturies con esta problemática, que se da’n cientros tanto públicos como concertaos. Dende la entidá yá se treslladó a la Conseyería d’Educación y a la Dirección Xeneral de Política Llingüística una montonera de reclamaciones de calter educativu al traviés d’un informe nel que se señalaben situaciones graves dentro de l’asignatura de Llingua Asturiana.
De manera concreta, la organización tien constancia d’un casu nel IES Aramo d’Uviéu nel que se modificó la matrícula ensin permisu del alumnu y polo tanto, l’estudiante ta cursando una asignatura que a la que nun s’apuntó. Esto ocurrió ensin avisu previu a la familia nin al estudiante. Al pedir cuentes a los responsables del istitutu, éstos animen al alumnu, menor d’edá, a dir a otru centru educativu (a cursar l’asignatura), cuando nel centru hai profesor de Llingua Asturiana y Lliteratura y namás sedría necesario amplia-y la xornada.
Dende Iniciativa polAsturianu, consideren esta, una situación de marxinación y maltratu al alumnu, contrariu a la llexislación vixente y desixen a la Dirección del Cientru que ponga solución darréu, yá que l’estudiante ta nesti momentu treslladáu a otra asignatura que nun escoyó. Pa ello, ampárense na Llei 1/98 de 23 de Marzu, d’Usu y Promoción del Asturianu (BOPA Númb.73, del 28-III-98) y na sentencia ratificatoria del Tribunal Supremu d’abril de 2012.
Asinamesmo, pidin a la Conseyería d’Educación una investigación interna pa saber quien foi la persona que modificó, ensin nengún tipu de permisu atentando contra la voluntá del estudiante y la so familia, el documentu oficial de la matrícula.
This work is licensed under a Creative Commons Attribution 4.0 International License.
