Asturies ya l’Internacionalismu

  • 29 Ochobre, 2020

Les persones con sensibilidá d’esquierda pueden compaxinar perfechamente un sentimientu nacional d’amor a la so nación, con un sentimientu internacional de solidaridá coles demás naciones. Namás dende la soberanía se tien capacidá pa xestionar esa deseyada solidaridá

 

Fernando Nicolás Velasco

Un espectru eleváu de la ciudadanía asturiana amuesa con arguyu’l so calter internacionalista, particularmente ente aquellos que se consideren d’esquierdes. Munches d’estes persones, conciudadanes nueses, tán convencíes que l’internacionalismu ye sinónimu d’arrogancia, solidaridá y xusticia social y económica ente les persones, ensin importar ónde vivan. Y entá nun tando del tou equivocaes, quédense nuna apreciación superficial, que nun se dirixe al vraeru tresfondu del significáu del internacionalismu, tal como foi concebíu polos primeros pensadores del ideariu socialista, que, en cualesquier casau, tien de ser afechu a les realidaes del períodu históricu y la dómina actual.

Pa poder falar con propiedá, ye obligatorio ponese’n situación y entender el significáu de los términos rellacionaos col internacionalismu, lo mesmo que de él mesmu.

El diccionariu de la RAE define nacionalismu como un sentimientu fervorosu de pertenencia a una nación y d’identificación cola so realidá y la so hestoria. Una segunda aceición ye que se trata de la ideoloxía d’un pueblu qu’aspira a convertise n’estáu. Por considerase nación.

Entós, precísase saber que ye una nación. De nuevu, allegando a la RAE, una nación ye’l conxuntu d’habitantes d’un país rexíos por un mesmu gobiernu, según el territoriu qu’habiten. Tamién puede ser el conxuntu de persones d’un mesmu orixe, que de normal falen el mesmu idioma y tienen una tradición común. Salgamos de duldes al respective de lo qué ye un país: territoriu costituyíu n’estáu soberanu, o los sos habitantes, pero tamién un territoriu que puede costituyir una entidá dientro d’un estáu, por cuenta de les sos carauterístiques cultural y xeográfiques propies.

La cosa complícase.

A lo último internacionalismu sedría, per una llau l’actitú qu’antepón lo internacional a lo puramente nacional. Por otru, l’enclín socialista que defende l’asociación internacional de los obreros pa llograr ciertes revindicaciones.

Buscando estes palabres nun dicionariu de llingua inglesa, como’l Collis-COBUILD, nun atopamos grandes desemeyances, pero sí llama l’atención de qu’esta última definición, la considerancia del so calter socialista (y comunista) namás apaez en diccionarios americanos (1).

Magar los obreros asturianos del primer terciu del siglu XX pescanciaron perfechamente lo que ye, o yera, l’internacionalismu, l’aplicación práutica que fixeron del mesmu, nun foi del tou atinada. Y el so primer y básicu fracasu, que bien pocos supieron entender, ye que la primer meyora de la so llucha internacionalista sedría la lliberación de la so propia y primida nación: Asturies.

“Conxuntu de persones d’un mesmu orixe, que de normal falen el mesmu idioma y tienen una tradición común”. ¿qué ye, qu’ Asturies nun cumple esti criteriu? Podría alegase que munchos territorios cumplen esti criteriu. Ye innegable, pero Asturies ye un d’ellos. Y les tradiciones de Asturies tán bien marcaes y son bien estremaes a les d’otros territorios. Pa otru artículu daria la realidá de la llingua asturiana, viva entá con too y con eso el maltratu carecíu dende l’anexón que’l país sufrió pola corona castellana. Maltratu más acusáu cuanto más recién nel tiempu.

Con éses ¿porqué los obreros asturianos nun entamaron por considerase como nación pa, dende ende entamar la so llucha internacionalista? La rempuesta ye tan simple de dar como complicáu ye’l fondu de la mesma. Naquel momentu históricu, yeren les clases altes de la sociedá, los qu’ostentaben el capital, los qu’enclinaben la so ideoloxía escontra’l nacionalismu. Esto asocedió en Catalunya y n’Euskadi. N’Asturies el poder de los “ricos” nun yera tan grande, y la manifestación nun pasó de ser un cobarde rexonalismu. Nun había realmente un texíu industrial. Nun había dueños d’empreses, “capitalistes” que fundaren un nacionalismu asturianu. Mayormente, la industria taba en manos de foriatos. L’alta burguesía asturiana conformábase por vieyos “fiosdalgo” que debíen la so escasa fortuna al monarca español. Difícilmente diben morder la so man.

El movimientu obreru n’Asturies allinióse coles tesis de los de les zones más industrializaes del estáu, ónde la oposición al nacionalismu “de los patrones” constituyóse nun fuerte internacionalismu. Entendible, pero falto de visión.

Hai que poner sobro la mesa que la Internacional Socialista asitióse a favor de los movimientos independentistes, manifestando asina’l so calter antiimperialista. Los obreros asturianos nun supieron ver esi otru frente de lliberación. A puntu tuvieron, mientres la revolución d’Ochobre de 1934, pero faltó un líder que tuviera unos oxetivos claros.

Darréu, mientres la guerra civil española, cola proclamación del Conseyu Soberanu, punxéronse unes blimes, pero la rápida derrota, xunida a la represión y al desembarcu d’inmigrantes precisaos de trabayu, callaron el tonu de la propuesta pa bien llargu tiempu.

Yá en dómina más recién, nos territorios ónde se formara un fuerte nacionalismu “de dreches”, los movimientos obreros entendieron que l’internacionalismu nun ye enemigu del nacionalismu, si non que lu complementa. Pero volvamos equí a la definición del términu. Nacionalismu ye un sentimientu fervorosu de pertenencia a una nación y d’identificación cola so realidá y la so hestoria. Nun confundir con imperialismu, expansionismu, xenofobia o cualesquier otru tipu d’actitú que suponga arrogarse prebendes, poderes o drechos estraordinarios. Nun ye negativo ser nacionalista, siempres y cuando eso nun anteponga lo nacional a lo internacional.

Les persones con sensibilidá d’esquierda pueden compaxinar perfectamente un sentimientu nacional d’amor a la so nación, con un sentimientu internacional de solidaridá coles demás naciones. Namá dende la soberanía tiense capacidá pa xestionar esa deseyada solidaridá.

Ye lo que tien qu’entender la esquierda mayoritaria en Asturies.

(1) Nota del autor: la llingua inglesa nun ta dirixida por una academia de la llingua, polo que nun esiste un diccionariu de la mesma, sinón que de dalguna manera ríxese por diccionarios editaos por otros organismos, razón pola cual pueden alcontrase deficiones desemeyaes, polo xeneral llixeramente, de les pallabres.

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies