Camientos alrodiu’l la tasa de probitú

  • 16 Ochobre, 2020
Prestaríame allonxar a Barbón y compañía de los sos xuegos de rol y besamanes monárquicos p’amosayos cual ye’l sinificáu fondu de los númberos colos que xueguen, que implica pertenecer a los cuasi 252.000 asturianos que malviven nel país. Convídolos a dar un voltiu per Asturies

Llucía F. Marqués

Ayeri vi a un home sacar una mazcarina de la papelera y poneila al so fíu. Güei lleo na prensa qu’a finales del 2019 cuasi ún de ca cuatro asturianos, 251.863, 73.000 más qu’en 2017, vivíen no que vien siendo la miseria. Estos son datos d’anantes del confinamientu, l’andanciu, los EREs, despidos y preslles. Nun cuesta muncho maxinar que la cifra medraría un bon cachu nesti fantásticu 2020, pero da igual, voi quedame con esos datos.

El X Informe de siguimientu del indicaor de riesgu de probitú y esclusión social n’Asturies (2008-2019), presentáu ayeri na Xunta Xeneral, ye cenciellamente demoleor. Asturies recueye’l pior desemplegu del Estáu na cabera década, y ayeri mesmo dicíen que tamos por perder otru 35% de los puestos de trabayu. La tasa de probitú medró un 57% namás en 2019, siendo un 171% pior que nel 2008 y allugándose na segunda pola cola, con namás Andalucía en pior situación.

Comu d’avezu, los más afeutaos son les muyeres, les families monomarentales, la reciella y les persones con discapacidá, ello ye, los más vulnerables, duplicándose la tasa de probitú nos nucleos familiares con un solu adultu a cargu.

Na reciella precisamente quiero cientrame. Falamos, tirando mui pelo baxo, d’un neñu ensin recursos de ca 4. Suponiendo, que ye muncho suponer, que se repartan por igual pente la escuela pública y la privá, tenemos 5 en ca clas de primaria (2 o 3 nes de secundaria, cola nueva ratio de 10).

Cinco rapacinos por clas que nun tienen siquiera p’asegurase una alimentación decente, que tendrán difícil mercar ropa o calzao curioso y sedrán, poro, blancu preferente d’acosadores y abusones, que nun suañarán siquiera con clases particulares, que si son de secundaria nun podrán dir, cenciellamente, a la metá virtual de les clases. Cinco rapacinos, qu’amás, tienen munches posibilidaes de pasar munches hores a soles, porque n’Asturies la probitú va d’avezu acompangada de trabayos precarios, y que tampocu tendrán el meyor ambiente pa estudiar, porque reconozámoslo, la congoxa de nun saber de que vivir nun xenera precisamente gayola. Neños y neñes que suspenderán, porque los profesores nun entruguen si pudieron facer los trabayos, si daquién en casa los aidó a istalar los programes y a descargar los llibros virtuales o si teníen comu se conectar al “Teams”; baxen puntos y puntu.

Families pa les que la mazcarina sedrá llavable al infinitu, que recoserán la goma cuando rompa o garrarán con disimulu les mazcarines de la basoria y rellenarán los botes d’hidroalcol con una solución al 80% d’agua, porque na vida real hai esmolecimientos mayores qu’un teóricu posible contaxu.

Entantu, Adrián Barbón siguirá viviendo nun mundiu paralelu dedicáu a los xuegos de rol y a los cuentos de princeses. Nel so universu l’únicu esmolecimientu ye cumplir protocolos y talo se diría que les mazcarines (quirúrxiques y homologaes, por supuestu) son de baldre, neto que l’hidroxel. N’Asturies maxinaria del so xuegu, les piqueñes empreses sobreviven, en grupinos de 6 en 6 separaos metru y mediu, ensin que l’ambiente de tensión y medrana inducío afeute a los ingresos y los tresportes atarraquitaos son una quimera. La probitú, la xorreciente fienda social, la precariedá y la congoxa del díi pente díi, nun esisten pa esti home, tou queda iguao con bones semeyes y pallabres tan grandones comu ermes.

Prestaríame sacalu de la so burbuxa, que tanto-y presten, y convidalu a dar un paseín per Asturies.

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies