Ispeición Llaboral intervien pa investigar el casu de más de 20 collaboraores que nun formen parte llegal de la plantiya seique trabayen n’esclusiva pa esi mediu de comunicación escritu

Tres de los afeutaos pola situación presentaron va unes selmanes  una denuncia ante l’organismu responsable de velar pol cumplimientu de la llegalidá nel marcu llaboral, na que afirmaben tar escribiendo regularmente pal diariu El Comercio, siendo esti la so única fonte d’ingresos, pero calteniendo’l so estatus d’autónomos.

Nesa mesma situación alcuéntrense al menos 0tros 20 periodistes, de los que dellos pasaron ya a prestar declaración, pero’l procesu xudicial abiertu de magar estes tres demandes ta nesti intre aparáu por negociaciones pente la empresa y los tres denunciantes.

El Comercio nun ye l’únicu diariu asturianu qu’utiliza la figura del redautor collaboraor, especialmente nes corresponsalíes llocales, redautores en cargu de l’actualidá d’una fastera concreta pa la qu’escriben con regularidá, en dalgunos casos diariamente ya en situación d’alta precariedá. Lo más común ye que teletrabayen, poniendo ellos mesmos los medios pa desendolcar el so llabor, ya en munchos casos cobren “al pesu”, ello ye, en función de les llinies espublizaes. En dalgunos casos, oblígaseyos a roblar un contratu mercantil pa protexese ante posibles denuncies.

Nuria Prendes

This work is licensed under a Creative Commons Attribution 4.0 International License.