Del 22 al 25 d’Ochobre cellebraráse’n Xixón la décima edición del Salón Internacional de les Sidres de Gala –SISGA– en formatu telemáticu y presencial
Depués de retrasar la fecha del X SISGA, cola esperanza de que se normalizaren les circustancies, y ante la pocu esperanzadora evolución del andanciu, la Fundación Asturies XXI decide cellebrar a finales d’Ochobre una versión semipresencial del certame qu’abre Asturies a les meyores sidres de copa del mundiu, al tiempu que presenta ante espertos internacionales les nueses sidres.
El X SISGA cellebraráse del 22 al 25 d’Ochobre, nun formatu que compaxina la participación telemática y presencial. Les actividaes que tan previstes na parte presencial son el concursu de les meyores sidres de Gala, la tastia y harmonización de la sidre premiao con estremaes propuestes gastronómiques, no que sedrá un Brunch de Gala y a la fin, la entrega premios.
El concursu del SISGA escueye añalmente les meyores sidres n’estremaes categories, de copa, d’espolleta, de xelu, de pera, llicores, auguardientes… Afitándose dientro de cauna cuatro modalidaes de premios: oru, plata y bronce sigún la puntuación algamao, y Premium, a la meyor sidre dientru de ca respeutiva categoría. Al mesmu preséntense añalmente pente 80 y 90 sidres estremaes, vinientes de más d’una docena de países tan llonxanos física y culturalmente comu pueden ser Xapón, Estaos Xunios o la República Checa, pero que comparten la so pasión pola bebida fermentao de mazana.
Nel Brunch de Gala, que se cellebrará nel Restorán el Duque, tará llendáu el númberu de participantes, siendo imprescindible la iscripción previa. Nelli presentaránse estremaes propuestes gastronómiques p’harmonizar coles sidres premiaes, demientres se dan a conocer los ganaores del Concursu SISGA. Darréu procederáse a entregar los correspuendientes premios, too ello con emisión online n’abierto, y con conexones en direutu a los llagareros que nun puen asistir al eventu.
Redaición InfoAsturies
This work is licensed under a Creative Commons Attribution 4.0 International License.
