El Muséu’l Calamar Xigante de L.luarca, que caltenía impresionantes exemplares de pelosín,  foi baltáu pol temporal de 2014, perdiéndose delles pieces y treslladándose bona parte’l so conteníu al Parque la Vida, en L.luarca,  almacenándose’l restu a la espera de la que se suponía sedría rápida recostrución. 6 años dempués, los valdesanos ven con optimismu la nueva propuesta del gobiernu municipal p’abrir el muséu el 1 de Xunetu de 2021 nel recintu l’antigua discoteca Villa Blanca.

Esti ye’l tercer proyeutu anunciáu y espérase que’l definitivu. En 2018 anuncióse l’allugamientu’l Muséu nos llocales de la Confradería de Pescaores, un llugar afayaizu pola so cercanía a la mar y pol so significáu, pero qu’al paecer requiría una inversión mayor de la disponible, polo que s’anunció’l so treslláu a los antiguos Cines Goya, poniéndose la fecha de Xunu del 2020 pa la so apertura. L’allugamientu nos Cines Goya nun prestó muncho, per un llau porque tan lloñe la mar y pel otru porque se cuntaba con esti espaciu, de propiedá municipal, pa la creación d’una Casa Cultura y un Auditoriu pal conceyu.

Finalmente, esti allugamientu foi tamién descartáu y l’actual compromisu del gobiernu municipal ye abrir el Museu’l Calamar el 1 de Xunetu de 2021 nel recintu de l’antigua discoteca Villa Blanca. El proyeutu paez tar más avanzáu que los anteriores, yá que cunten con un alcuerdu cola propiedá, un proyeutu d’adautación del espaciu y tan trabayando cola Conseyería de Cultura pa la planificación de la museística.