Dende la Coordinadora Ecoloxista d’Asturies piden que s’acompangue la declaración de veda pa la pesca l’oriciu con otres midíes que protexan esti equinodermu

La veda de pesca del oriciu (paracentrotrus lividus) que finaba’l 30 Setiembre del 2020, prorrogaráse de manera indefinida por parte la Conseyería de Mediu Rural y Cohesión Territorial del Gobiernu d’Asturies. Les comprebaciones feches pola Universidá d’Uviéu amuesen que’l preslle de la pesquería profesional y esportiva nun algamó los resultaos esperaos y la so recuperación nun ye entá abonda. 

La fuerte demanda d’oricios por parte los asturianos llevó a esti apreciáu equinodermu a una situación esmolecedora, polo que nel 2016  impúsose una veda que se va ampliando mes a mes fasta agora, cuandu sigue vixente. Les repoblaciones nel Ocidente amuésense insuficientes, ya’l continuu furtivismu sobre una especie qu’entarda 5 años n’algamar el so tamañu adultu, continúa llevando al oriciu asturianu camín del desaniciu. 

Los casos de contaminación marina tamién dañen l’ecosistema, dificultando la so recuperación.

Pa la CEA ye urxente que s’aumente la xixilancia, se controlen los vertios a la mariña y se ponga’n marcha un plan de curiau, non solo del oriciu, sinón d’otres especies escases que tan siendo llevaes al desaniciu por mor d’una xestión inadecuada, comu ye’l casu de l’angula o l’ocle.

Llucía F. Marqués

This work is licensed under a Creative Commons Attribution 4.0 International License.